Бөгөн туристарҙы ылыҡтырырға кәрәк, тибеҙ. Был хаҡта киң мәғлүмәт сараларында ла күп һөйләнелә, әммә буклеттарҙан, ҡағыҙ продукциянан башҡа, "шундай ерҙәр бар", тип күрһәтерлек тәбиғи объекттарыбыҙҙың барыһы ла ситтә, баш ҡаланан алыҫ урынлашҡан.

Уның ҡарауы, баш ҡалала Урмансылар паркы бар һәм уның территорияһында мин Башҡортостандың ялан, урманлы ялан, урман, таулы урман зоналарының макеттарын күрергә теләр инем. Уларҙың күләмен, дәүмәлен урынға ҡарап хәл итергә мөмкин. Ләкин унда ошо дүрт зонаның барыһы ла сағылыш табырға тейеш: ялан зонаһында ауыл хужалығы сағылыш табып, башаҡтар үҫеп ултыра, комбайндар йөрөй һ.б. Урманлы ялан зонаһында умартасылыҡты күрһәтергә була. Урман зонаһында - урман, урман етештереү буйынса эштәр, урман кәсепселеге күрһәтелергә тейеш. Тау зонаһында - тауҙар, иң матур ҡомартҡыларҙан Ирәмәл, Шүлгәнташ, Мораҙым тарлауығы, Ғәҙелша шарлауығы һ.б. макеты урын алһа, шәп булыр ине.
Өфөгә туристар күп килә. Уларҙы иң тәүҙә ошо паркка сәйәхәткә алып килеп, артабан ҡайҙа барырға үҙҙәре хәл итһә, насармы ни? Бала саҡта белем алыуҙы "Әлифба"нан башлап, Маркстың "Капитал"ына барып еткән кеүек, экскурсияны Өфөнән башлап, зоналар буйына дауам итергә мөмкин. Бының өсөн ошо макеттарҙы эшләтеп, матур итеп урынлаштырырға ғына кәрәк. Балыҡ бит ҡоро ҡармаҡҡа ҡапмай, уны емләргә кәрәк. Был да туристар өсөн "ем" булыр ине, минеңсә.
Үҙем 1986 йылдан бирле Урал буйлап автосәйәхәт итәм. Ҡайҙа ғына булманым, ниндәй генә хәл-торошҡа тарыманым, ниндәй генә йәнлектәр, ҡоштар, бөжәктәр, тәбиғәт менән танышманым. Һоҡланып бөтә алмайым. Ғәрәп Әмирлектәре, Төркиәләр ары торһон, беҙгә бөгөн кислородҡа бай таҙа һауа, үҙебеҙҙең урман, тау, ялан мәтрүшкәһе генә кәрәк.

Илдус ҠОЛҺАРИН.

КИРЕ СЫҒЫРҒА