Бөгөн мәктәп үҙидаралығы, мәктәп ҡоролтайҙары, мәктәп парламенттары менән бер кемде лә аптыратып булмай. Эйе, беҙ, йәштәр, заман менән бергә атлайбыҙ һәм барлыҡ яңылыҡтарҙы тиҙ арала эләктереп алабыҙ, үҙебеҙҙең "үлсәмгә" һалабыҙ.

Республикала әүҙемләшкән урындағы инициативаларҙы хуплау программаһы кеүек үк, беҙҙең мәктәптә лә муниципаль белем биреү ойошмалары уҡыусыларының тәҡдимдәренә нигеҙләнгән инициативалы проекттарҙы тормошҡа ашырыуҙы күҙаллаған проекттар конкурсы үтте. Унда биш команда ҡатнашып, беҙҙең "Төньяҡ амурҙары" проекты еңеп сыҡты. Еңеүебеҙ үҙенә күрә символик әһәмиәткә лә эйә, сөнки быйыл ата-бабаларыбыҙ ҡатнашҡан 1812 йылғы Ватан һуғышына 210 йыл тула, тап ошо һуғышта уларҙы "Төньяҡ амурҙары" тип йөрөтә башлайҙар. Был беҙгә оло яуаплылыҡ өҫтәй. Шуға күрә проект өҫтөндә бик күп эшләргә, күп нәмәләрҙе өйрәнергә, тарихҡа, тәрбиә мәсьәләләренә иғтибар йүнәлтергә тура килде.
Проектта ҡаралғанса, ошо арала мәктәптә тир бүлмәһе булдырыу, уны йыһазландырыу кеүек эштәрҙе атҡарып сығырға кәрәк. Бының өсөн уҡ, ян, лазерлы автомат, пистолет, экран, проектор һатып алырға кәрәк буласаҡ. Традицион яндан уҡ атыу күңел асыу йәки милли спорт төрө генә түгел, ә милләтте рухи тәрбиәләү, үҫеп килгән быуында үҙ милләтенә, тыуған иленә, тарихына ҡарата һөйөү уятыу, милли йолаларҙы тергеҙеү сараһы ла.
Был тирҙа шөғөлләнеп, ГТО нормаларының һөҙөмтәһен яҡшыртырға, "хәүеф төркөмөнә" ингән балаларҙы, ата-әсәләрҙе һәм яҡын-тирәләге ауыл халҡын да ылыҡтырыу, төрлө спорт ярыштары, фестивалдәр, һабантуйҙар үткәреү, хәрби-патриотик тәрбиә эше алып барырға мөмкин. Шулай уҡ 8-се, 10-11-се синыф уҡыусылары (150 кеше) өсөн йәшәү хәүефһеҙлеге нигеҙҙәре дәрестәренең практик өлөштәрен ошо тирҙа үткәрергә мөмкин. Кластан тыш саралар ярҙамында йәш быуынды бынамын тигән итеп илһөйәрлек рухында тәрбиәләргә, төрлө сараларға ата-әсәләрҙе лә йәлеп итеп, быуындар бәйләнешен нығытырға була.
Йыл да район күләмендә үткәрелгән хәрби сараларҙа беҙҙең мәктәптән 20 егет ҡатнаша. Әгәр ҙә беҙҙең мәктәптә тир булһа, улар атыу буйынса үҙҙәренең күрһәткестәрен тағы ла нығыраҡ яҡшыртыр ине. Бынан тыш, ун бала традицион яндан уҡ атыу буйынса Өфө районы өсөн республика һәм төбәк-ара, Бөтә Рәсәй ярыштарында ҡатнашырға йыйына. Шулай уҡ уҡытыусылар командаһы ла "Зарница" уйындарында үҙ көсөн һынап ҡарай, "Мәргән уҡсы" этабында ҙур һөҙөмтәләр күрһәтә ала. "23 февраль - Тыуған илебеҙҙе һаҡлаусылар", " Атайҙар көнө" һәм башҡа сараларҙа ла уҡ атыу бәйгеләрен индерергә мөмкин.
Традицион яндан атыу йолаһын тергеҙеү, үҙаллы шөғөлләнгән уҡсыларҙың оҫталыҡтарын камиллаштырыу, милли спорт төрҙәрен, милли йолаларыбыҙҙы өйрәнеү йәш быуынға рухи, патриотик тәрбиә бирә тип уйлайым. Шуның өсөн дә был проект мәктәбебеҙҙә яҡлау тапты. Артабан район күләмендә лә хупланыр тип өмөтләнәм.

Дания ҒӘЗИЗОВА,
Өфө районы Шамонин мәктәбенең 10-сы класс уҡыусыһы.
"Киске Өфө" гәзите, №3, 2022 йыл

КИРЕ СЫҒЫРҒА