Мин Өфө районы Шамонин ауылы урта дөйөм белем биреү мәктәбенең 10-сы синыфында белем алам. Быйыл Башҡорт теле һәм әҙәбиәте буйынса үткәрелгән төбәк-ара олимпиадала ҡатнашып, еңеүсе булдым.

Ошо мауыҡтырғыс, сәмле бәйгелә ҡатнашыу, бер яҡтан, еңел кеүек тойолһа, икенсе яҡтан, ауыр булды. Сараға башҡорт телен, илен яратҡан, үҙ халҡы менән ғорурланған балалар йыйылғайны. Бөтәбеҙҙең дә матур, асыҡ итеп, бер рус һүҙен дә ҡушмай һөйләшеүебеҙ бигерәк тә оҡшаны. Конкурсанттар барыбыҙ ҙа үҙебеҙҙе бер татыу ғаилә кеүек тойҙоҡ, бер-беребеҙ менән танышып, аралашып, уңыштар теләштек. Еңеүсе икәнемде һуңғы минуттарға тиклем белмәнем. Олимпиаданы ябыу тантанаһында үҙ исем-шәрифемде ишеткәс, бик ныҡ тулҡынландым. Алдыма ҡуйған маҡсатымдың тормошҡа ашыуына шатландым һәм ғорурландым.
Был мәртәбәле сараға көн һайын әҙерләндем, уҡытыусым менән мәктәптә кискә тиклем әҙерләнеп ултырҙыҡ. Көн дә китап уҡып, хатта ундағы мөһим тип һанаған урындарҙы ике дәфтәр тулғансы күсереп яҙыуым еңеүемә ҙур өлөш индерҙе тип уйлайым. Шулай уҡ остазымдың да өлөшө бик ҙур. Шуға, кәйефем төшкән мәлдәрҙә тынысландырып, матур, йылы һүҙҙәре менән йыуатып, илһамландырып торған башҡорт теле һәм әҙәбиәте уҡытыусыһы Рәмилә Усман ҡыҙы Шәриповаға оло рәхмәтемде белдерәм.
Әлбиттә, туған телеңә һөйөү бала саҡтан, ғаиләнән башлана. Ошо донъяны әле бер ҙә аңламаған сабыйҙың әйткән беренсе һүҙҙәре йөрәктә мәңгегә уйылып ҡала. Миңә лә туған телем - бишектә ятҡанда уҡ ишеткән башҡорт теле әсә һөтө менән һеңгән. Башҡортса һөйләшеүем, башҡорт булыуым менән бик ғорурмын.
Туған телемә, тормошҡа һөйөү тәрбиәләгәндәре, ҡыйын минуттарҙа хуплап торғандары өсөн атай-әсәйемә рәхмәтлемен. Башҡорт теленең артабан да ошондай тиңдәр араһында тиң булыуын теләйем. Тиҫтерҙәрем араһында, ғаиләлә генә түгел, көндәлек тормошта, төрлө өлкәләрҙә лә башҡорт теле иң күп аралашҡан, заманса тел булһын ине тип тырышам. Гел башҡортса һөйләшәм!

Дания ҒӘЗИЗОВА.
Өфө районы Шамонин ауылы.
"Киске Өфө" гәзите, №4, 2022 йыл

КИРЕ СЫҒЫРҒА