Мин ауылда тыуып-үҫкән кеше булараҡ, баш ҡалаға килеп йәшәй башлағас та ҡала ситендә ағас йорт һалып инеү хыялы менән яндым һәм ике йыл элек, ниһайәт, уны тормошҡа ашырҙым. Ҡаланың тынсыу фатирынан һуң иркен, саф һауалы, ағас еҫе борҡоп торған йортта йәшәү үҙе бер рәхәтлек. Шәхси йорт тигәндә, уны ғүмер буйы төҙөйһөң дә төҙәтәһең бит инде, шуға күрә ялдарым ихатала эш менән үтә.

Мәҫәлән, өсөнсө йәй инде сәй эсеү, шешлек ҡыҙҙырыу, ғөмүмән, тышта ял итеү урыны эшләү менән булыштым. Ике ай буйы эшләнем беседканы. Ике ҡатлы иттем һәм оттом, сөнки ҡунаҡҡа килгән һәр кем ошондай уҡ беседка эшләп биреүемде һораны. Шулай уйламағанда үҙемә килемле генә өҫтәмә эш таптым.
Ике ҡатлы беседкалар күп функциялы булыуҙары менән отошло. Унда йәйгеһен генә түгел, ә ҡышын да ҡулланып була торған зоналар эшләргә мөмкин. Шулай уҡ ололар һәм балалар зонаһын айырым бүлергә лә була. Икенсе ҡатын быяла менән көпләгәндә йәки бөтөнләй асыҡ ҡалдырғанда йәйге миҙгелдә ҡояш ҡалҡыуын һәм батыуын күҙәтергә мөмкин, ә бейек ағастар аҫтында ултырған беседка һәр ваҡыт ҡоштар һайрауына күмелә.
Ләкин тәү ҡарашҡа ябай ғына күренгән беседканы эшләүҙең дә үҙ нескәлектәре бар. Ул ихатаның айырылғыһыҙ һәм мөһим элементы булараҡ йортҡа ла тап килеп торорға, дизайны ла матур булырға тейеш. Ихата әллә ни ҙур түгел икән, ифрат ҙур беседка эшләп ҡуйыу килешмәй. Шулай уҡ уның бейеклеге лә әллә ни ҙур булмаҫҡа тейеш. Ә ҙур ихатала иһә бәләкәй генә беседка юғалып ҡаласаҡ.
Беседканы төрлө формала эшләргә мөмкин. Мәҫәлән, диңгеҙҙә хеҙмәт итеүселәр уны яхта формаһында эшләргә заказ бирә һәм башҡалар.
Эш барышын тәфсирләп яҙып тормайым, уны оҫта ҡулдар үҙҙәре лә яҡшы белә йәки интернеттан ҡарарға була. Иң мөһиме, ике ҡатлы беседкалар эшләп, ғаилә бюджетына өҫтәмә килем килтерергә була.

Зөлфәр КӘЛИМУЛЛИН.
"Киске Өфө" гәзите, №33, 2022 йыл

КИРЕ СЫҒЫРҒА