Республика көнө байрамы алдынан Өфө ҡала округы хакимиәтенең мәҙәниәт һәм сәнғәт буйынса идаралығы социаль селтәрҙәрҙә "Өфө Башҡортостан Республикаһы көнө менән ҡотлай" тип аталған флешмобта ҡатнашырға саҡыра. Уның төп маҡсаты - илһөйәрлек, Башҡортостанға һәм уның баш ҡалаһына һөйөү тәрбиәләү.

Сарала ҡатнашыу өсөн 10 октябргә тиклем 1 минутлыҡ видеоролик яҙҙырып, уны "Бәйләнештә" социаль селтәрендәге сәхифәгеҙгә урынлаштырып, @kulturaufa тип билдәләргә һәм #УфаПоздравляетСднемРБ хештеген ҡуйырға кәрәк. Видеороликтың Өфөнөң танылған урынында төшөрөлөүе шарт. Йомғаҡ 13 октябрҙә яһаласаҡ.
- 5 октябрҙә киске сәғәт 5-тә Өфө балалар филармонияһында ижади коллективтарҙың концерты булып үтте. Шул уҡ көндө Нуғай ауылы мәҙәниәт йортонда башҡорт ҡатын-ҡыҙҙарының милли биҙәүесе - селтәр эшләү буйынса "Милләт байлығы" тип аталған оҫталыҡ дәресе ойошторолдо.
- 6 октябрҙә Өфө ҡала хакимиәтенең Ҙур залында баш ҡала предприятиелары һәм учреждениеларының иң яҡшы хеҙмәткәрҙәре тәбрикләнде.
- 7 октябрҙә Ҡала мәҙәни-күңел асыу үҙәгенең Ҙур залында ижади коллективтарҙың концерты булды.
- 11 октябрҙә баш ҡала артистары С. Юлаев, Ш. Бабич һәйкәлдәренә сәскәләр һалыу, шулай уҡ Совет майҙанында М. Шайморатов һәйкәлен асыу тантанаһында ҡатнашасаҡ.
- Өфө ҡала планетарийында көндөҙгө сәғәт 1-ҙә, 3-сө яртыла һәм 4-тә уйын программалары, конкурстар һәм викториналар ойошторола.
- Бөтә Рәсәй һуҡырҙар йәмғиәтенең Башҡортостан бүлексәһе тарихы музейы ойошманың уҡыу-етештереү предприятиелары әйберҙәренең күргәҙмәһенә саҡыра. Ул эш көндәрендә иртәнге сәғәт 10-дан киске 6-ға тиклем эшләй.
- Балалар музыка мәктәптәрендә тематик сәғәттәр, уҡыусылар концерттары, баш ҡала китапханаларында китап, фото күргәҙмәләре, уйын программалары һәм квиздар, осрашыуҙар, шиғриәт саралары үтә.

ӘЙТКӘНДӘЙ...
БР Мәғариф министрлығы менән ЮНЕСКО эштәре буйынса Башҡортостан Республикаһы комитеты Республика көнөнә һәм Рәсәйҙә халыҡтарҙың мәҙәни мираҫы йылына бағышлап "Урал батыр" эпосын һөйләү буйынса флешмоб ойоштора. Унда теләгән кеше ҡатнаша ала. Бының өсөн 12 октябргә тиклем эпосты республикала йәшәгән халыҡтар телдәрендә һөйләп, 45 секундлыҡ видеороликты "Бәйләнештә" социаль селтәрендә үҙ сәхифәңдә урынлаштырырға һәм #УралБатыр_2022 #ДеньРеспубликиБашкортостан_2022 хештегтары менән билдәләргә кәрәк. Ойоштороусылар сағыу сығыштарҙы һайлап алып, социаль селтәрҙәрҙә һәм киң мәғлүмәт сараларында таратасаҡ.

Ләйлә АРАЛБАЕВА.
"Киске Өфө" гәзите, №40, 2022 йыл

КИРЕ СЫҒЫРҒА