Үткән аҙнала Башҡортостандың Милли музейында йәнле, дәртле-дарманлы, рухлы осрашыу - "Самауырлы ритайым" байрамы үтте. "Музейҙа матур осрашыу" проекты сиктәрендә уҙған сараға Өфөнән генә түгел, ә республиканың төрлө төбәгендә һәм хатта сит илдәрҙә йәшәгән милләттәштәребеҙ ҙә килде.

Ҡунаҡтарға музейҙың этнография залдары буйлап бай мәғлүмәтле, тәрән йөкмәткеле экскурсия уҙғарылды. Кисә матур йырҙар һәм дәртле бейеүҙәр, хисле шиғырҙар менән үрелеп барҙы. Ҡурай, баян һәм гитара моңдары, йөрәктәрҙе наҙға һәм моңға сорнаны. Ә "Самауырлы ритайым" командаһы, ғәҙәттәгесә, тәм-томдан һығылып торған өҫтәл ҡуйып, барыһын да мәтрүшкәле сәйҙәр менән һыйланы.
Музейҙың экспонаттар фонды бик бай. Уларҙың һәр береһе тарихи сығанаҡ булараҡ ҡәҙерле һәм баһалап бөткөһөҙ. Музей залдарында ҡуйылған әйберҙәрҙән тыш, бик һирәк осраҡта ғына киң йәмәғәтселек иғтибарына сығарылған экспонаттар була. "Самауырлы ритайым"ға нәҡ ошондай экспонаттар менән биҙәлгән тирмә ҡуйылып, теләге булған һәр кемдең башҡорт милли кейемендә фотоға төшөү мөмкинлеге булды. Кисә барышында тирмәнең бер минутҡа ла буш тормауы һәм халҡыбыҙҙың милли кейемендә фотоһүрәт эшләргә теләүселәрҙән сират йыйылыуы был йүнәлеште әүҙемләштерергә кәрәк икәненә ишара булды.
Кисәлә балаларҙың күп булыуы айырыуса шатландырҙы. Уларҙың милли кейемдәрҙә килеүе, һәр бер йырҙы иғтибар менән тыңлауы, бейеү көйҙәрен "әрәм" итмәйенсә, бер кемдән оялмай-тартынмайынса, башҡортса бейеүҙәре йөрәктәргә май булып яғылды. Ошондай балалар тәрбиәләгән атай-әсәйҙәргә "Афарин!" тиергә генә ҡала.
Музейға беренсе тапҡыр килеүселәр ҙә бар ине был кистә. Улар музейҙың ҙурлығына, матурлығына, экспонаттар байлығына иҫтәре китеп ҡарап йөрөнө. "Башҡортостандың үткәнен һәм бөгөнгөһөн белергә теләһәң, республиканың төп музейына килергә кәрәклеген ниңә әлегәсә белмәгәнмен?" тигән уйҙар сорналышында танышты улар залдар менән. Әлбиттә, байрам программаһының тығыҙ, мауыҡтырғыс булыуы был кистә музейҙың бөтә залдарын да ҡарап сығырға форсат бирмәне ҡунаҡтарға, шуға күрә барыһын да икенсе айҙа үтәсәк "Самауырлы ритайым"да көтөп ҡалабыҙ.

Гөлназ МАНАПОВА,
БР Милли музейы хеҙмәткәре.
"Киске Өфө" гәзите, №7, 2023 йыл

КИРЕ СЫҒЫРҒА