Республикала "Башҡортостандың сигелгән картаһын" булдырыу буйынса эш башланды. Уны Республика халыҡ ижады үҙәге, республиканың муниципаль берәмектәре һәм оҫталар бергәләп эшләйәсәк.

Республика халыҡ ижады үҙәгенең матбуғат хеҙмәте хәбәр итеүенсә, карта тулыһынса сигелеп эшләнәсәк. 1,5 метрҙан 2 метрға тиклем үлсәмдәге туҡымала муниципалитеттарҙың тәбиғәт ҡомартҡылары ғына түгел, ә уларҙа йәшәгән халыҡтарҙың уникаль традицияларын да күрергә мөмкин буласаҡ.
- Проект өҫтөндә Өфөнән һәм муниципалитеттарҙан оҫталар төркөмө эшләйәсәк. Һәр район үҙ макетын әҙерләй, унда ул муниципалитеттың үҙенсәлеген сағылдырырға тейеш. Муниципаль берәмектәрҙең атамалары картала күрһәтелмәйәсәк һәм был ниндәй район икәнен һүрәт буйынса ғына аңларға мөмкин буласаҡ, - тип аңлатты проектты төҙөүселәр.
Эштә сәйлән, мулина, кейеҙ, күн, ярым аҫыл таштар, тәңкәләр һәм төрлө сигеү техникаһы кеүек материалдар файҙаланыласаҡ. Карта бер тотош полотноға сигеләсәк.
Рәсәй халыҡтарының мәҙәни мираҫы йылы тип иғлан ителгән 2022 йылда, "Рәсәй Федерацияһының сигелгән картаһы" масштаблы акцияһы тормошҡа ашырыла, унда илебеҙҙең бөтә төбәктәре, шул иҫәптән яңылары ла ҡатнаша. Карта июнь айында Сыуашстан Республикаһының Чебоксар ҡалаһында Беренсе Бөтә Рәсәй балалар фольклориадаһы сиктәрендә тәҡдим ителә.
2022 йылдың көҙөндә Сыуашстандан коллегалар Рәсәй төбәктәренең сигелгән карталары фестивален ойоштороу тураһында тәҡдим индерә, уны төбәктә 2023 йылдың авгусында үткәреү планлаштырыла. Тәҡдимде В.Д. Поленов исемендәге Рәсәй дәүләт халыҡ ижады йорто хуплай һәм бер нисә Рәсәй субъекты, шул иҫәптән Республика халыҡ ижады үҙәге лә был йүнәлештә эш башланы ла инде.

"Киске Өфө" гәзите, №11, 2023 йыл

КИРЕ СЫҒЫРҒА