Ошо һүҙҙе әйтеү менән күҙ алдына республикабыҙ бар гүзәллеге менән килеп баҫа. Яратҡанға шулай ул, тиерһегеҙ. Эйе, был һүҙҙе яратҡан кеше генә шулай матур итеп әйтә ала. Матур итеп, ғорурланып, ихласлыҡ менән. Был һүҙ йәнле кеүек. Әйткәндә, ишеткәндә, уның ысынлап та йәне бар һымаҡ.
Ә уның яҙылышын күҙ алдына килтерһәң, ул йәйғорҙоң бар төҫтәрендә килеп баҫа. Киң ҡырҙар, иген баҫыуҙары, мәғрур ҡаялар, саф һыулы сылтыр шишмәләр, урманы, йылғаһы, тыныс, имен тормошто һөйгән эшһөйәр халҡы күҙ алдынан үтә.
Был һүҙҙе яратмайынса әйтеп булмай. Сөнки ул иң затлы, иң ҡиммәтле һәм иң йылы һүҙ. Уның энергетикаһы көслө. Йыш ҡына киң мәғлүмәт сараларында журналистар "Башкирия" тип әйтә. Ошо һүҙҙе яратмағандар уны әйтеүселәрҙе тәнҡитләгәндәрен ишетергә тура килгәне бар. Әммә был һүҙ ҙә оҡшай. Сөнки башҡортса әйтелеше нисек ғорур яңғыраһа, урыҫсаһы ла шулай көслө яңғырай. Уны ла асыу һәм битараф итеп әйтеп булмай. Ике һүҙҙә лә баҫым бик урынлы төшә. Шуға ла уларҙы ғорурлыҡ тойғоһо менән генә әйтергә була.
Был ике һүҙ ҙә ихтирамға лайыҡ! Икеһе лә үҙ урынында. Уның икеһен дә ҡулланып, күпме документаль, тарихи, публицистик, мәҙәни, әҙәби әҫәрҙәр тыуған. Шуға күрә уның икеһе лә йәшәргә хаҡлы һәм лайыҡлы. Яратайыҡ, ғорурланайыҡ, һаҡлайыҡ!
Ләйсән СӘЛИХОВА.
"Киске Өфө" гәзите, №40, 2023 йыл
КИРЕ СЫҒЫРҒА
|
БАШҠОРТОСТАН!
