Мәскәүҙә Федерация Советында быйыл Өфөлә июндә үткән Рәсәй һәм Беларусь төбәктәренең X форумына йомғаҡ яһалды. Кәңәшмәлә Башҡортостан Башлығы Радий Хәбиров ҡатнашты.

Рәсәй Федерацияһы Советы рәйесе Валентина Матвиенко билдәләүенсә, был үткәреү кимәле, йөкмәткеһе һәм һөҙөмтәләре буйынса иң яҡшы форумдарҙың береһе булды. Башҡортостан етәкселеге ғәйәт ҙур ойоштороу һәм әҙерлек эштәре алып барҙы, бәйләнерлек бер сәбәп тә булманы, тине ул. "Радий Хәбировтың форумды әҙерләүгә ҙур иғтибар бүлеүен беләм, - тине Валентина Матвиенко. - Күптән түгел коллегам, Беларусь Республикаһы Советы рәйесе Наталья Кочанова менән осраштым. Ул тағы ла форум тураһында бик матур һүҙҙәр әйтте".
Матвиенко фекеренсә, иң мөһиме - һандар буйынса һөҙөмтәләргә өлгәшелгән, төбәктәр, компаниялар һәм фирмалар араһында килешеүҙәргә ҡул ҡуйылған. "Хөрмәтле Радий Фәрит улы, Андрей Геннадьевич, Лилия Салауат ҡыҙы (Л.С. Ғүмәрова - Федерация Советының фән, мәғариф һәм мәҙәниәт буйынса комитеты рәйесе), һынатмағанығыҙ һәм ҙур эш башҡарғанығыҙ өсөн ҙур рәхмәт, - тине Валентина Матвиенко. - Башҡортостанда бик көслө фекерҙәштәр коллективы эшләүенә инандым. Өфө халҡының ысын башҡорт ҡунаҡсыллығы һәм ихласлығы менән ҡунаҡтарҙы ҡабул итеүе хаҡында ла бик йылы тәьҫораттар ҡалды".
Валентина Матвиенко форумды ойоштороуға ҙур өлөш индергәне өсөн Радий Хәбировҡа Федерация Советының Маҡтау грамотаһын тапшырҙы.
Журналистарға биргән интервьюһында Башҡортостан Башлығы форумдың республика өсөн мөһимлеге хаҡында һөйләне һәм алған наградаларҙы ул сараны лайыҡлы һәм сифатлы үткәргән идара итеү командаһы һәм дөйөм республиканың эшен юғары баһалау тип атаны.
- Беҙҙең өсөн дуҫ илдәр менән партнерлыҡ айырым әһәмиәткә эйә, - тип һыҙыҡ өҫтөнә алды Радий Хәбиров. - Рәсәйҙе Белоруссияға асыу өсөн башҡарған эштәребеҙ Башҡортостан өсөн бик мөһим. Сауҙа һәм үҙ-ара инвестициялар йәһәтенән һиҙелерлек үҙгәрештәр күрәбеҙ.
Республика Башлығы әйтеүенсә, киләһе йылда Өфөлә Рәсәй менән Ҡаҙағстан араһында төбәк-ара хеҙмәттәшлек форумы үтәсәк. Ул республиканың тышҡы иҡтисади әүҙемлеген артабан үҫтереүгә, дөйөм алғанда ике дәүләттең үҙ-ара эш итеүенә булышлыҡ итәсәк.

Ләйлә АРАЛБАЕВА.
"Киске Өфө" гәзите, №46, 2023 йыл

КИРЕ СЫҒЫРҒА