Минскиҙа "Лiстапад" халыҡ-ара кино фестивале тамамланды. Был ваҡиға бик күп илдәрҙең кинематографистарын берләштерә. "Лiстападзiк" программаһына 36 илдең 15 анимация фильмы һайлап алынған.

"Лiстападзiк" конкурс программаһы балалар һәм анимация фильмдары өсөн бүленгән. Быйыл Ә. Абдразаҡов исемендәге "Башҡортостан" киностудияһы унда "Төньяҡ амурҙары" йәнһүрәтен (режиссеры Руслан Тәүәбилев) күрһәтте. Йәнһүрәт жюриҙың махсус призына лайыҡ булды, тип хәбәр иттеләр Мәҙәниәт министрлығының матбуғат хеҙмәтенән.
Хәтерегеҙгә төшөрәбеҙ, "Төньяҡ амурҙары" - Башҡортостандың федераль прокат алған беренсе тулы метражлы йәнһүрәте. Был эш Башҡортостан Республикаһы Башлығы Радий Хәбиров ярҙамы менән бойомға ашырылды. Батыр башҡорт яугирҙары тураһында йәнһүрәт геройҙары Башҡортостандың мәҙәниәт министры Әминә Шафиҡова, опера йондоҙо Асҡар Абдразаҡов, йырсылар Айҙар Ғәлимов, Радик Юлъяҡшин (Elvin Grey), Нәзифә Ҡадирова, Via Chappa төркөмө лидеры Илья Тавлияров, спорт комментаторы Азамат Моратовтың тауышы менән һөйләй.
"Башинформ" агентлығы хәбәр иткәнсә, 29 ғинуарҙа Мәскәүҙең Кино йортонда тулы метражлы анимация фильмы күрһәтелде. Май айында картинаны Өфө тамашасылары ла ҡарай алды. "Башинформ" Башҡортостан Башлығы Радий Хәбировтың республикала йәшәүселәрҙе "Төньяҡ амурҙары"н ҡарарға саҡырыуы тураһында хәбәр иткәйне.

"Киске Өфө" гәзите, №47, 2023 йыл

КИРЕ СЫҒЫРҒА