Донъя кимәлендәге Евразия фәнни-мәғариф үҙәгенең вуз-ара кампусында Башҡортостан Башлығы Радий Хәбиров республика һәм Башҡортостанда эшләгән федераль киң мәғлүмәт саралары вәкилдәре менән осрашты.

Осрашыуҙа Радий Фәрит улы ни өсөн икенсе мөҙҙәткә кандидатураһын күрһәтергә ҡарар итеүен аңлатты. Уның һүҙҙәренсә, ул һайлауҙа ҡатнашыу-ҡатнашмау тураһында уйланғанда бер нисә фекерҙән сығып эш иткән. Беренсенән, башланған проекттарҙы тамамларға кәрәк. Уларҙың ҡайһы берҙәрен дүрт-биш йыл эсендә тамамлау күҙаллана. "Икенсенән, беҙ яугир егеттәребеҙгә ярҙам күрһәтеү эшен тейешенсә яйға һалдыҡ. Барлыҡ ошо ярҙам сараларын, гуманитар ылауҙарҙы беләһегеҙ. Шундай ваҡытта был эштән китергә кәрәкмәй тип иҫәпләйем, - тигән фекерҙә Радий Хәбиров. - Халыҡҡа биргән вәғәҙәләребеҙҙе үтәйбеҙ. Ләкин тамамланырға тейешле эштәр ҙә бар әле". Радий Хәбиров икенсе мөҙҙәткә һайланырға хәл итеүенең өсөнсө сәбәбен дә әйтте. Ошо ауыр осорҙо бергәләп үткәреп ебәрергә кәрәк, тине ул."Барыһы ла килеп сығыр тип уйлайым. Беҙ республика менән бергә ковидты ла үттек. Махсус хәрби операция, иҡтисадыбыҙ өсөн ҙур проблемалар тыуҙырған ҡот осҡос баҫым, санкция сәйәсәте менән бәйле ауырлыҡтарҙы һеҙҙең менән бергә үтәбеҙ. Быны аңларға кәрәк. Шуға күрә миңә хәҙер әлеге осорҙо бергә үтергә кәрәк кеүек тойола, - тине Башҡортостан Башлығы. - Әлбиттә, ихтыяж да бар. Унһыҙ эшләргә ярамай. Аҙаҡтан республика ғорурлана алырҙай эштәр башҡарырға теләйем".
Башҡортостан Башлығы шулай уҡ ошо осрашыуҙа яңғыраған һорауға яуап биреп, Рәсәй Президенты Владимир Путин менән эшлекле осрашыуҙың ябыҡ өлөшөндә ниндәй мәсьәләләрҙе күтәреүҙәре тураһында һөйләне. Унда Махсус хәрби операцияға ярҙам күрһәтеү, шулай уҡ республикала күләмле проекттарҙы ғәмәлгә ашырыуға бәйле мәсьәләләр хаҡында һөйләштек, тип билдәләне Радий Хәбиров. "Алдыбыҙҙа Өфөнөң Көньяҡ урау юлын төҙөү бурысы тора. Быйыл комплекстың ҙур өлөшөн тамамларбыҙ. Бынан тыш, Пугачев урамында тәртип урынлаштырырбыҙ. Был иһә хаҡы 30 миллиард һумдан ашыу тәшкил иткән етди проект", - тип билдәләне Радий Хәбиров. Башҡортостан Башлығы Владимир Путин менән һуғыш ветерандары өсөн клиник госпиталь, лидерҙар мәктәбен төҙөү мәсьәләләрен дә тикшереүҙәрен әйтте. Улар буйынса федераль кимәлдә ыңғай ҡарарҙар ҡабул ителеүен дә билдәләне.

"Киске Өфө" гәзите, №16, 2024 йыл

КИРЕ СЫҒЫРҒА