Мәскәүҙәге "Рәсәй" Халыҡ-ара күргәҙмә майҙансығында уҙғарылған Халыҡ ижады аҙналығы сиктәрендә Башҡортостан стендын килеп күреүселәр "Күп яҡлы Башҡортостан" тип аталған үҙенсәлекле кейеҙ балаҫ баҫты.

Ойоштороусылар был проект республиканың һәм бөтә Рәсәйҙең берлеген һәм мәҙәни мираҫ байлығын сағылдырған символ булыр, тигән матур маҡсат ҡуйған. Был ижади эштә теләгән һәр кем ҡатнаша алды. Кейеҙгә биҙәктәр замансараҡ алым - "ҡоролай баҫыу" ысулы менән башҡарылған, ә аҙаҡтан уны ҡәҙимгесә һыулап баҫҡандар. Уны Башҡортостан Республикаһында йәшәгән халыҡтарҙың орнаменттары биҙәй.
Кейеҙ балаҫ һуғыу эше тәжрибәле оҫта, Рәсәйҙең Рәссамдар союзы, "Кейеҙ оҫталарының ижади берлеге" ассоциацияһы ағзаһы Ләйсән Ғилманова етәкселегендә атҡарылды. "Был сәнғәт өлгөһө Рәсәйҙең дуҫ, ярашып йәшәүсе, берҙәм күп милләтле халҡының символы ғына түгел, ә гүзәл илебеҙҙең мәҙәни күп төрлөлөгө һәм рухи байлығын да сағылдыра", - тине оҫта. Ижади проектты 29 апрелдә эшләп бөттөләр һәм ғәм халыҡҡа күрһәттеләр.

"Киске Өфө" гәзите, №18, 2024 йыл

КИРЕ СЫҒЫРҒА