Бөрйәндәге "Шүлгәнташ" дәүләт ҡурсаулығының музей-экскурсия комплексы хеҙмәткәрҙәре өсөн тағы бер мәшәҡәт өҫтәлгән: улар килгән ҡунаҡтартарҙы, ял итеүселәрҙе айыуҙарҙан ҡурсалай.

Был юлы комплексҡа өс айыу килә. "Шүлгәнташ" дәүләт ҡурсаулығы директоры Михаил Косарев һөйләй: "Беҙ бер нисә хеҙмәткәр менән кис килеп, айыуҙарҙы күҙәтеү өсөн һәр беребеҙ уңайлы урын алдыҡ. Беҙҙең алда ҡатмарлы бурыс тора: нисек тә был өс йыртҡысты ҡыуып ебәрергә. Ләкин айыуҙар кешенән ҡурҡмай, уларҙы ваҡытлыса ғына өркөтөргә була. Оҙаҡламай хайуандар яңынан пәйҙә була һәм ҡунаҡ йорттарына, сүп-сар һауыттарына, умарталарға яҡынлай. Яңыраҡ бер тайыштабан ҡунаҡтарҙың ҡотон алғайны. Икенсе тайыштабан сүп-сар контейнерҙарын түңкәреп, ҡурсаулыҡ биләмәһендә аҙыҡ эҙләп йөрөнө. Уларҙың ҡарбуз һәм ҡауын ҡалдыҡтарын эҙләп килеүенә инандыҡ..."
Дәүләт инспекторы Кирилл Евстегнеев поста дежурҙа торғанда тайыштабандың төнгө мажараларына шаһит булыуы тураһында һөйләне: "Бер айыу музейға һәм экскурсия комплексына Ағиҙел йылғаһы яғынан килгән, ҡурсаулыҡ экскурсоводтары йәшәгән йорт янынан үткән. Улар миңә шунда уҡ хәбәр иттеләр. Йыртҡысты ҡыуа башланым, ә ул тау яғына урманға инеп китте. Күп тә үтмәне, яҡындағы ҡунаҡхананан шау-шыу, ҡысҡырыуҙар ишеттем. Шул саҡ аңланым: айыу сүп-сар һауытын ҡолатҡан һәм унан ҡауын алған. Был хәл төнгө сәғәттә булды", - тине Кирилл Евстегнеев.
Экологик белем биреү, пропаганда һәм мәғлүмәт секторы начальнигы Ләлә Хәйбуллина граждандарға хайуанды ашатырға, уға яҡын барырға ярамағанлығы хаҡында иҫкәртә һәм аҙыҡ-түлек ҡалдыҡтарын туҡталыштар, йорттар янында төнгә ҡалдырмаҫҡа кәңәш бирә. "Айыу менән осрашҡанда ситкә ҡарамағыҙ, әкрен генә сигенегеҙ, тыныс булығыҙ. Әгәр йыртҡыс һеҙгә табан йүнәлә икән, уның ҡылығын туҡтап, кү-ҙәтеп торорға кәрәк. Белгестәр йүгермәҫкә, ағасҡа менмәҫкә кәңәш итә - айыуҙар быларҙың барыһын да кешеләргә ҡарағанда күпкә яҡшыраҡ башҡара, һеҙ ҡотола алмаясаҡһығыҙ, һөжүмде ҡуҙғытасаҡһығыҙ. Уға бер нәмә лә ырғытмағыҙ һәм ҡысҡырмағыҙ, әммә тигеҙ тонда һөйләшергә, киреһенсә, хайуанды тынысландырырға кәрәк", - тип кәңәштәре менән уртаҡлаша "Шүлгәнташ" ҡурсаулығының музей-экскурсия комплексы хеҙмәткәре.

Дарья СУББОТИНА.
"Киске Өфө" гәзите, №31, 2024 йыл

КИРЕ СЫҒЫРҒА