Быйыл Өфө ҡалаһы башҡорт теле уҡытыусыларының август кәңәшмәһендә бер бик шәп китап һатып алдым, тип ҡыуанып та өлгөрмәнем, артынса уҡ күңелһеҙ тойғолар кисерергә тура килде.

"Народы Мира" тип аталған китап ул. 2014 йылда Мәскәүҙә "Росмэн" нәшриәтендә баҫылған. Арыу ғына биҙәлгән, сифатлы төҫлө тышлыҡта, текстарға төҫлө милли кейемдәге ҡыҙ-егеттәр һүрәттәре бирелгән. "Уҡыусыларыма Рәсәйҙә йәшәгән милләттәр тураһында мәғлүмәт биргәндә, төрлө кисәләргә әҙерләнгәндә бик тә кәрәге тейер был китаптың" , тип, ысын күңелдән ҡыуанып һатып алғайным уны. Өйгә ҡайтҡас та китап менән танышырға ултырҙым. "Инеш һүҙ" бүлегендә, Рәсәйҙә рус милләте 80 процент тәшкил итә, унан ҡала татарҙар һәм украиндар килә, ә башҡорт халҡы һан буйынса 4-се урында тора, тип яҙылған. "Дүртенсе урында торғас, туған халҡым тураһында мәғлүмәт киң йөкмәткеле булырға тейеш бында", - тип уйлап, артабан "Башҡорттар" тигән бүлекте эҙләйем. "Волга буйы халыҡтары" тигән бүлектә сыуаш, мордва, мари, татар халҡы тураһында мәғлүмәт бар, милли кейем кейгән вәкилдәре лә күрһәтелгән. Әммә башҡорттар тураһында бер һүҙ ҙә юҡ. Артабан "Кавказ халыҡтары" тигән бүлек башлана. Башҡорттар тураһында "Урал халыҡтары" тигән бүлектә яҙылғандыр, ахыры, тип өмөтләнеп, ары китәм. Аптыраш! "Урал халыҡтары" тигән бүлек бөтөнләй булмай сыҡты. Ҡыйын булып китте күңелгә. Уйҙарымдан уйылып йөрөйөм бына.
"Балалар энциклопедияһы" тип атап баҫылған бик кәрәкле фәнни-популяр әсбап авторҙары ниңә башҡорт халҡының Рәсәй халыҡтары гөлләмәһендә лайыҡлы урын алырға тейешле конституцион хоҡуғын һанға һуҡманы икән? Мин бының менән һис килешмәйем.

Миңһылыу АБДУЛЛИНА,
башҡорт теле уҡытыусыһы.

КИРЕ СЫҒЫРҒА