Бына ун йылдан ашыу инде Башҡортостанда "Ағинәй" йәмәғәт ойошмаһы уңышлы эшләп килә. Тәү ҡарамаҡҡа, дөрөҫөрәге, уйһыҙҙарға ғына улар йырлап-бейеп йөрөгән кеүек тойолдо башта. Төптән уйлап ҡараһаң, улар бик ҙур эш алып бара. Халҡыбыҙҙың йолаларын, ғөрөф-ғәҙәттәрен, милли аш-һыуыбыҙҙы, матди ҡиммәттәребеҙҙе һәм ҡатын-ҡыҙҙарға ғына хас шөғөлдәрҙе, кәсептәрҙе тергеҙеүгә ең һыҙғанып тотоноп, шул эштәрҙе уңышлы атҡарып киләләр. Ә инде уларҙың һәр ерҙә милли күлдәктәрҙә, милли биҙәүестәрҙә донъя йәмләп йөрөүе үҙе бер күккә сөйөр ғәмәл.

Ә бына ир-егеттәребеҙ һәр йәһәттән ҡалыша. Йәғни, ир-егеттәребеҙ башҡара торған бурыстарҙың аҡһауын, уларға хас шөғөл-кәсептәрҙең онотола барыуын әйтәм. Мәҫәлән, бөгөн ҡайһы берәүҙәр күпләп йылҡы үрсетеү менән маҡтана ала. Эйе, был башҡорттоң төп кәсептәренең береһе. Ләкин ата-бабаларыбыҙ йылҡыны ит өсөн генә аҫрамаған, ул уның төп таянысы, уң ҡанаты, айырылғыһыҙ юлдашы булған. Ә бының өсөн ат яуҙарҙа ла, сабышта ла ал бирмәҫ итеп өйрәтелгән, күнектерелгән. Бөгөн иһә сабыш аттары юҡ дәрәжәһендә, сөнки ир-егеттәребеҙ был шөғөлгә шулай уҡ кәртә ҡуйған. Ә инде ат еккеһенә кәрәкле арба, сана, ыңғырсаҡ, йүгән, эйәр һымаҡ әйберҙәр эшләү бөтөнләй онотолған. Ғөмүмән, һуңғы йылдарҙа малсылыҡты, йылҡысылыҡты үрсетеү тураһында күп һөйләйбеҙ. Ләкин ошо шөғөлдәр йәнәшендәге кәсеп-һөнәрҙәрҙе тергеҙеү берәүҙең дә башына инеп сыҡмай. Мәҫәлән, көтөүсе сыбыртҡыһыҙ көтөү көтә алмай. Ә бөгөн кем уны үрә белә? Ә кем оҫта итеп салғы яный, тапай? Һәнәк, көрәк, балта һаплау оҫталары ла юҡ дәрәжәһендә.
Ошолар тураһында ла һөйләшеү мәле еткәндер, тип уйлайым. Һәм РФ Дәүләт Думаһы депутаты Зариф Байғусҡаров етәкселегендә республикала ойоштороласаҡ "Ир-егеттәр ҡоро" ошо тәңгәлдә эште йәнләндереп ебәрер, тигән өмөттә ҡалам. Республикала беренсе тапҡыр үткәрелгән ҙур конференцияға Мәләүездән ике делегат һайланды. Шуның береһе - мин, Мәләүез башҡорттары ҡоролтайы башҡарма комитеты ағзаһы, икенсеһе - йәш быуынға илһөйәрлек тәрбиәһе биреү йәһәтенән етди эш алып барған "Батальон" йәмәғәт ойошмаһы етәксеһе Йәмил Әлмөхәмәтов. Был башланғыс бик ваҡытлы булды. Форумда "Ир-егеттәр ҡоро"ноң эш йүнәлештәре, бурыстар, шулай уҡ ир-егеттең, айырыуса атай кешенең статусын күтәреү буйынса ла маҡсаттар билдәләнер, тип өмөтләнәм.

Фәнис БИКТАШЕВ.
Мәләүез районы.
(Теманың дауамы был һандағы Зариф Байғусҡаров менән әңгәмәлә)

КИРЕ СЫҒЫРҒА