"Киске Өфө" гәзитен уҡыусыларға килемле генә шөғөл хаҡында яҙып үткем килә. Үҙем ошо өлкәне ныҡлап өйрәнеп, эш башлағаныма бер йыл.

Мин өйҙә микройәшеллектәр (микрозелень) үҫтереп һатам. Микройәшеллек - үҫемлектәрҙең шытымы. Улар беҙ түтәлдәрҙә күреп өйрәнгән үҫемлектәрҙең бәләкәй версияһы, тип әйткәндә лә була. Ләкин түтәлдәге үҫемлектән айырмалы рәүештә, шытымдарҙы оҙаҡ үҫтерергә, тәрбиәләргә кәрәкмәй - олононда 1-2 япраҡ барлыҡҡа килһә, улар ашарға яраҡлы, тип һанала. 2 - 7 сантиметр оҙонлоғонда ғына булған шытымдар ғәҙәти үҫентеләрҙән тышҡы төҫө менән генә түгел, ә химик составының күпкә файҙалыраҡ булыуы менән дә айырыла. Микрогрин исеме аҫтында йөрөтөлгән шытымдарҙа цитокин (үҫеш гормоны, күҙәнәктәр бүленеше процесын активлаштырыусы) һәм ауксин (шулай уҡ үҫешкә ҙур йоғонто яһаусы) матдәләр синтезлана. Улар түтәлдә ҙур булып үҫкән үҫемлектәрҙә лә бар, ләкин күпкә әҙерәк.
Микрогриндар сәләмәт тормош алып барыусылар тарафынан ҙур һорау менән файҙалана. Уларҙы салат, аш, коктейль, смузиларға һалып ҡулланалар.
Микройәшеллек менән ҙур масштабта шөғөлләнеүселәр уны ресторан һәм кафеларға күмәртәләп һата. Уңыш алыр өсөн, ғәҙәттә, 5-7 көн етә. Бер аҙнанан арттырмайынса үҫкән йәшеллекте һатыуға сығарырға кәрәк. Мин бер боксты 100 һумдан һата башлағайным, хәҙер 150 һум менән тәҡдим итәм. Әлеге көндә ассортиментта гәрсис (горчица), кинза, редис, борсаҡ, руколла үҫтерәм. Аҙнаһына 2000-2500 һум аҡса эшләйем. Артыҡ көс талап итмәгән, юлға аҡса сығармаған, реклама өсөн күп сығым китмәгән шөғөл өсөн ярайһы килем, тип иҫәпләйем. Артабан ассортиментты тағы ла арттырырға уйлайым.
Микройәшеллек үҫтереү менән шөғөлләнә башлау ҙур сығымдар талап итмәй. Уларҙы тупраҡта, ҡағыҙҙа, мамыҡта, марляла һәм банкаларҙа үҫтерергә була. Уңыш алыр өсөн, ғәҙәттә, 5-7 көн китә. Үҫтереү ысулдарын һәм юлдарын интернет селтәрендә ҡарарға мөмкин, барыһы ла тулы һәм аңлайышлы итеп теркәлгән.
Эшҡыуарлыҡтың төп талабы - ныҡышмаллыҡ, тип уйлайым. Бер тапҡыр килеп сыҡмаған икән, ташлап ҡуйма, тағы ла эшләп ҡарап, ошо эшмәкәрлектең бөтә нескәлектәрен өйрәнеп, тағы ла тәүәккәлләгәндә, барыһын да булдырырға мөмкин.

Мөнир СӘЙФЕТДИНОВ.
Стәрлетамаҡ ҡалаһы

КИРЕ СЫҒЫРҒА