Һеҙҙең тарафтарҙа кис ултырыуҙар бармы? Ә бына минең тыуған яғым Ейәнсура районы Самаҙы ауылында әле булһа был матур йола йәшәй.

Үҙ булмыштарына тоғро ҡалып, нәҫелдән күсә килгән төп һөнәрҙәренең береһе булған шәл бәйләү шөғөлөн дауам итә ауылым уңғанбикәләре. Заманалар алышынып торһа ла, улар төп шөғөлдәренә хыянат итмәгән, сөнки шәл уларҙы туйындырған да, кейендергән дә, уҡытҡан да, туйҙар үткәрергә лә ярҙам иткән килем сығанағы булған.
Улай ғына ла түгел, дебет менән булышыу уларҙың ҡандарына һеңгән күңел талабы һәм яңғыҙың ултырғанда күңелһеҙ уйҙарҙы теткеләп ташлап, бер епкә теҙеү ысулы ла, күмәкләшеп кис ултырып, фекер алышыу өсөн бер сара ла булып тора. Тап шуға ла Ейәнсура килендәре бер ваҡытта ла ҡул ҡаушырып ултырмай: телевизор ҡараймы, күршеһенә хәл белешергә инәме - уларҙың бәйләме ҡулдарында була. Ә дебет эшенең ни тиклем көс, таһыллыҡ, һәләт, сослоҡ, тапҡырлыҡ, зауыҡ талап иткәнен һөнәрмәндәр үҙҙәре генә белә. Кәзә дебетенең сифатын да, үлсәмен дә улар бер күҙ һалыуҙа билдәләй, ә шәлгә биҙәк һалып бәйләүҙәре уларҙың күңелендә тыуған тотош ижад балҡышы. Дебетте аялаһындармы, орсоҡто зыр килтереп еп иләһендәрме, йә энә тотоп, бәйләм бәйләһендәрме - ҡулдарына күҙ эйәрмәй, телдәрендә шаяртыу, ә йөҙҙәрендә үҙ эштәренән ҡәнәғәтлек кисереше.
Ҡатын-ҡыҙҙың тауыҡ сүпләһә лә бөтмәҫ эшенән ваҡыт, көс-хәл табып кис ултырыуға килгән был гүзәл заттар арыу-талыуҙы беләме икән, әллә донъяуи мәшәҡәттән ошо шөғөлдәре арҡылы арыналармы икән? Һәр хәлдә, халҡыбыҙҙың төрлө йолалары менән бер рәттән, шәл өмәһен дауам итеүсе ауылым уңғандарына дан, тип, һоҡланам да, ғорурланам да. Ауылыбыҙҙың ҡотон арттырыусы, йәшәйешенә йән өрөүсе апайҙарым, еңгәйҙәрем, инәйҙәрем бит улар минең. Ҡулығыҙҙан һөйөнөгөҙ, һау-сәләмәт кенә булығыҙ. Белгәндәрегеҙҙе киләсәк быуынға өйрәтеп ҡалдырыу һеҙҙән бурыс - шул теләгем.

Динара ҠОТЛОБАЕВА.
"Киске Өфө" гәзите, №20, 2022 йыл

КИРЕ СЫҒЫРҒА