Башҡортостандың баш ҡалаһында ағастан скульптуралар эшләү буйынса беренсе асыҡ конкурс тамамлана. Уның башланғысында ҡала хакимиәте башлығы Ратмир Мәүлиев тора һәм ул ошо көндәрҙә эш барышы менән танышты.

- Һис шикһеҙ, эштәр бик матур. Уларҙың һәр ҡайһыһында тәрән мәғәнә ята. Скульптураларҙың форматы төрлө, иң ҡыҙығы - уларҙы эшләү бик ҡатмарлы. Был онотолған сәнғәт төрө. Шуға күрә бурысыбыҙ - ҡырҡып ташланған ҡарт ағастарҙы ташламаҫҡа, ә улар менән ҡулланырға өйрәнергә кәрәк. Беҙ был материалға икенсе ғүмер бирергә тейеш, - тип билдәләне Ратмир Рәфил улы.
Конкурста 13 кеше - профессионалдар ҙа, һәүәҫкәрҙәр ҙә ҡатнаша. Улар үҙҙәренең эшендә Һыу инәһе, Арыҫлан менән бәләкәй Урал батыр, Һомай ("Урал батыр"), Зөһрә ҡыҙ ("Алдар менән Зөһрә"), Шүрәле, Азамат, Зәлиә һәм сихырсы ("Ҡаҙ тәпәйе") кеүек башҡорт эпостары, әкиәттәре һәм легендалары геройҙарына мөрәжәғәт итә. Шулай уҡ ҡатнашыусылар ағастан тутыйғош Кешаны, тау бөркөтө, урмандағы айыу балалары, һыуһар, балыҡ тотоусы малай, "өс шөрөп" һәм Ильф менән Петровтың "12 ултырғыс" әҫәре буйынса скульптуралар эшләгән.
Оҫталарҙың эше тиҙҙән ҡаланың йәмғиәт урындарын биҙәйәсәк. Уларҙы "Өфө муйынсағы" маршрутына урынлаштырыу планлаштырыла. Конкурсҡа йомғаҡ 12 июндә яһаласаҡ һәм еңеүселәр бүләкләнәсәк. Киләһе йылдарҙа ла был бәйге дауам итәсәк һәм ул тағы ла киңерәк ҡолас алыр тип күҙаллана.

"Киске Өфө" гәзите, №22, 2022 йыл

КИРЕ СЫҒЫРҒА