"Киске Өфө" гәзитенең "Бәйләнештә" социаль селтәрендәге "Башстатус" төркөмө менән берлектә иғлан иткән "Башҡорт китабы топ-100+" акцияһына ҡушылған уҡыусыларыбыҙҙың тәҡдимдәрен һәр һанда күрһәтә киләбеҙ. Бөтәһе лә уҡырға тейешле китаптар исемлеге яйлап үҫә бара. Әлегә ул бына ниндәй:
1. "Урал батыр" башҡорт халыҡ эпосы
2. М. Аҡмулланың шиғырҙар йыйынтығы
3. Ҡол Ғәли "Йософ ҡиссаһы"
4. Ризаитдин Фәхретдин "Нәсихәттәр"
Артабан Башҡорт дәүләт университетының филология фәндәре кандидаты Рәмилә Йәнмырҙина Ғайса Хөсәйеновтың "Тормош" һәм "Донъя" тип аталған парсалар китаптарын бер ҡасан да актуаллеген юғалтмаҫ, мәңгелек әҫәрҙәр рәтенә индерергә тәҡдим итте.

- Ғайса Хөсәйеновтың бөтә әҫәрҙәрен дә уҡып сығырға тәҡдим итергә мөмкин, уның тарихи китаптарын, ғилми хеҙмәттәрен барыһы ла белергә тейеш. Шулай ҙа, йәштәрҙең дә, ололарҙың да күңеленә хуш килерҙәй парсалар китабын айырып, телгә алып китеү кәрәк. "Донъя" һәм "Тормош" тип аталған ике йыйынтыҡ башҡорт кешеһенә тормошто аңларға, йәшәү мәғәнәһен табырға ярҙам иткән хикмәтле китаптар. Йәштәр сит ил йәки урыҫ белгестәренең философия, психология буйынса яҙылған китаптарын уҡый. Ундағы кәңәштәр, фекерҙәр, аҡыл башҡа халыҡтың менталитетына, йолаларына, тәрбиәһенә нигеҙләнеп яҙылған һәм күбеһе беҙҙең асылға тап килмәй. Башҡорт халҡының тормоштоң төрлө аспекттарына ҡағылышлы уй-фекерҙәре, философияһы борон-борондан формалашып килгән. Беҙгә үҙ ерлегебеҙҙән сығып, рухи ҡиммәттәребеҙгә нигеҙләнеп яҙылған кәңәш китаптарын уҡыу кәрәк. "Кеше", "Әҙәп-әхлаҡ", "Ғүмер", "Дин", "Фән", "Философия" һ.б. тигән төркөмдәргә бүленгән парсаларҙа башҡорт халҡының философияһы, авторҙың донъяға ҡарашы тулыһынса сағылыш тапҡан. Был китаптар олоһона ла, кесеһенә лә кәрәкле бөтә һорауҙарға яуаптарҙы үҙенә туплаған. Фәһемле, ғибрәтле парсалар хикмәтле һүҙ өсөн генә түгел, һәр кемгә һабаҡ, фәһем биреү маҡсатында яҙылған. Был милләттәштәр ҡул аҫтында тотолоп, форсат тыуған һайын уҡылырға тейешле китаптар.
Ғайса Хөсәйенов бер парсаһында иң шәп китап ниндәй булыуы тураһында яҙған:
- Ниндәй китаптар шәп?
- Зиһенгә һәм күңелгә һеңгәне.
- Ниндәйҙәре йәнә шәберәк?
- Һинең үҙеңде уйланырға мәжбүр иткәне.
Был һүҙҙәр уның "Тормош" һәм "Донъя" китаптары тураһында әйтелгән төҫлө.
Хөрмәтле гәзит уҡыусыларыбыҙ! "Башҡорт китабы топ-100+" акцияһына һеҙ ҙә ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып үҙ фекерегеҙҙе белдерегеҙ!

Сәриә ҒАРИПОВА.

КИРЕ СЫҒЫРҒА