Рәсәй Президенты Владимир Путин тура эфирҙа үткән ил Хөкүмәте ағзалары менән кәңәшмә барышында башҡорт шихандарына бәйле ваҡиғалар тураһында үҙ фекерен белдереп, БСК тапҡан аҡса төбәкте үҫтереүгә инвестицияланмай, тип билдәләне.

- Халыҡты эш урыны мәсьәләһе борсой, әлбиттә, ләкин был ғына түгел. Рухи байлыҡ, тәбиғәт, тирә-яҡ мөхитте һаҡлауға бәйле мәсьәләләр ҙә борсой уларҙы. "Башҡортостан сода компанияһы"ның контроль пакеты айырым шәхестәрҙеке. Компания тарафынан эшләп алынған аҡсалар үҫешкә инвестицияланмай тиерлек, төбәктә ҡалмай. Былтыр, 45 миллиард һумлыҡ дөйөм төшөм алынһа ла, инвестиция маҡсаттарына 2,5 миллиард һум ғына бүленгән. Аҡсалар ҡайҙа? Офшорҙарҙа. 2018 йылда дивиденд 12,3 миллиард һум булған - был саф табыштан 106 процент тәшкил итә. 2019 йылда иһә саф табыштан 107 процент тәшкил иткән. Аҡсалар ҡайһы бер акционерҙар йәшәгән урындарға, Кипрҙағы иҫәптәргә, Францияға, Швейцарияға китә. Ҡайҙа теләйһең, шунда йәшәргә мөмкин, әлбиттә, беҙ ирекле ил. Ләкин һеҙ Рәсәйҙә аҡса эшләйһегеҙ икән, үҙ предприятиеларығыҙҙа эшләгән кешеләр тураһында, яңы эш урындары булдырыу тураһында уйларға кәрәк. Бындай хәлдәргә, ғөмүмән, иғтибарҙы көсәйтергә кәрәк. Контролһеҙ-ниһеҙ аҡса һығыу был - бына шундай күңелһеҙ күренеш", - тине Президент.
Бынан тыш, ул Рәсәй Хөкүмәтенә Башҡортостан етәкселеге менән берлектә был хәл менән шөғөлләнергә, шулай уҡ прокуратураға дәүләт пакетының юҡҡа сығыуына сәбәпсе булған килешеүҙең законлылығын тикшерергә ҡушты.

КИРЕ СЫҒЫРҒА