Өфөлә Әхмәтзәки Валиди урамын төҙөкләндереү барышында эшселәр тарихи объектҡа юлыҡҡан.

Ҡаҙыу эштәрен башлағас, Ғиниәтулла Ҡапҡаев тотҡан килем йортоноң ер аҫтында урынлашҡан бер ҡаты асылған. "Өфө ҡалаһының 450 йыллыҡ юбилейына әҙерлек барышында баш ҡалабыҙҙың бер нисә урамында, шул иҫәптән Зәки Вәлиди урамында төҙөкләндереү эштәре алып барыла. Мәҙәни мираҫ объекты булған йортта ҡаҙыу эштәре һөҙөмтәһендә уның ер аҫтында тороп ҡалған тотош бер ҡаты булыуы асыҡланды. Әлеге ваҡытта мәҙәни мираҫ объектын һаҡлап алып ҡалыу өсөн бинаның фасадын, ҡыйығын ремонтлау, цоколь ҡатын нығытыу эштәре башҡарыла", - тип яҙа Киров район хакимиәте башлығы Илвир Нурдәүләтов.
Зәки Вәлиди урамы, 67-се йорт адресы буйынса теркәлгән бина 1910-1911 йылдарҙа һалынған. Уның бай тарихы бар. Ул XX быуат башындағы революцияға тиклем Мосолмандарҙың Дини йыйылышы ағзаһы, Өфө ҡалаһының беренсе йәмғиәт мәсете муллаһы Ғиниәтулла Ҡапҡаевтың милеге була. Ул, шул ваҡытта етеш тормошта йәшәгән башҡа ҡала кешеләре кеүек, ошо бинаның бүлмәләрен ҡуртымға биреп, килем алған. Өйҙөң планына ярашлы, өс подъезлы бинаның айырым инеү урындары була. Бинала Ҡапҡаев магазин тота. Совет власы йылдарында элекке килем йорто ҡәҙимге торлаҡ итеп файҙаланыла. Бөйөк Ватан һуғышы йылдарында бинаның беренсе ҡатындағы берҙән-бер магазинда яҡын-тирәлә йәшәгән кешеләргә карточка буйынса икмәк һатылған, Фрунзе урамы буйлап оҙон сираттар хасил булған.

"Киске Өфө" гәзите, №41, 2024 йыл

КИРЕ СЫҒЫРҒА