Әхмәтзәки Вәлиди өҫтәле Башҡортостан Милли музейы филиалы - Ишембай районы Көҙән ауылындағы Әхмәтзәки Вәлиди музейында МАЗВ ОФ-11 һаны аҫтында һаҡлана. Өҫтәлдең музейға килеп эләгеү тарихы бик ҡыҙыҡлы.

Ул тәүҙә Ырымбурҙың Каруанһарайында һаҡланған, 1918 йылда Башҡортостан хөкүмәте вәкилдәре менән бергә Темәс ауылына "күсә". 1920 йылда Башҡортостан хөкүмәте менән Стәрлетамаҡҡа, ә 1922 йылда Өфөгә килә. 1970 йылда иҫәптән сығарылып, Башпотребсоюз складына алып барылған өҫтәлде Бибисара Азаматова күреп ҡалып, үҙенең кабинетына ҡуйырға тип Баймаҡҡа алып ҡайта. Төҙәтеп-йүнәтеп алынған өҫтәл артында Бибисара Мостафа ҡыҙы 20 йылдан ашыу эшләй. Иҫәп һаны буйынса ул был өҫтәлдең нәҡ Әхмәтзәки Вәлиди өҫтәле булыуын асыҡлай.
1994 йылда, Әхмәтзәки Вәлиди музейы асылғанға тиклем, музейҙың беренсе директоры Кәрим Шәйәхмәтов экспонаттар йыйыу барышында билдәле шәхестең өҫтәле Баймаҡта икәнен асыҡлай. Уны музейға алырға теләп, ул Баймаҡҡа өс тапҡыр бара, ләкин Бибисара Азаматова бирергә теләмәй. Шулай ҙа 1994 йылдың 4 октябрендә ул өҫтәлде музейға бүләк итә.
Өҫтәлгә 12,5 һәм 5,5 сантиметрлы тимер пластина беркетелгән, унда: "Зәки Вәлиди исемендәге музейға Баймаҡ халҡынан Каруанһарай ҡомартҡыһы. Октябрь, 1994 йыл" тип яҙылған. Имәндән эшләнгән өҫтәлдең үлсәме 200*100*80 сантиметр, буҫтау менән көпләнгән. Ике тумбалы, уларға ике яҡтан ағастан юнып-һырлап эшләнгән арыҫлан баштары беркетелгән, өҫтәлдең ҡапҡасында йоҙаҡлы өс тартма бар.

"Киске Өфө" гәзите, №14, 2023 йыл

КИРЕ СЫҒЫРҒА