Йәй хәүефле ваҡыт та. Һыуға батып һәләк булыусылар араһында балаларҙың күп булыуы бигерәк аяныслы.

Батып барған бала үҙен нисек тота икәнен беләһегеҙме? Ул ҡулдарын болғап ярҙамға саҡыра, ҡысҡыра, әүҙем хәрәкәтләнә, һыу сәсрәтә, нимәгәлер тотонорға тырыша тип уйлаһағыҙ, яңылышаһығыҙ.
Кеше шым ғына бата. Ул ҡулдарын да күтәрмәй, ҡысҡырмай ҙа. Был ваҡытта организмдың саҡ ҡына тын алырға ғына көсө бар. Тән вертикаль тора, бер бата, бер ҡалҡа. Был ғына арауыҡ эсендә ярҙам һорап ҡысҡырып булмай.
Күҙ алдығыҙҙа кешенең батып барыуы тураһында нисек белергә?
Батыусының башы һыуҙа, ауыҙы ғына өҫтә;

Башы артҡа ташланған, ауыҙы асыҡ;

Сәстәре маңлайын йә битен ҡаплаған;

Кеше һыуҙа вертикаль рәүештә тора, аяҡтары менән үҙенә ярҙам итмәй;

Йыш тын ала, ауыҙы менән тын алырға тырыша;

Арҡаһына әйләнергә тырыша;

Ул арҡандан яһалған баҫҡыстан менергә маташҡан кеүек күренә.

Аяғы һыуҙың төбөнә тейеп торғанда ла кеше бата ала.

Иң үкенеслеһе, ғәҙәттә, батып барыусы янында һәр ваҡыт кеше була, әммә ул уларға был турала әйтә алмай. Шуға ла иғтибарлы булығыҙ!

>
"Киске Өфө" гәзите, №23, 2023 йыл

КИРЕ СЫҒЫРҒА