Хәтер даръяһында баш ҡалабыҙ Өфө тураһында матур, иҫтәлекле тәьҫораттар бик күп минең. Шулай ҙа иң сағыу, иң мөһиме - 1990 йылдың 11 октябре, Башҡортостан суверенитеты иғлан ителгән көн.

Был иҫтәлекле көн күптәр күңелендә тәрән эҙ ҡалдырғандыр, тип уйлайым. Республика яҙмышына битараф булмаған илһөйәрҙәр бөтә район, ҡалаларҙан автобустарға тейәлешеп, 10 октябрь төнөндә юлға сыҡтылар.
Тулҡынланып, борсолоп, ҙур өмөттәр, хыялдар менән баш ҡаланың Аҡ йорто алдындағы майҙанда меңәрләгән халыҡ оло тарихи боролош көтә. Ер-һыу, тыуған халҡыбыҙ яҙмышы хәл ителгән көн ине был.
Ниһайәт, кискә генә БАССР-ҙың һуңғы 3-сө сессияһы тамамланды - республиканың мөстәҡиллеге-суверенитеты тураһында иғлан ителде. Майҙанға йыйылған халыҡ бал ҡорттары күселәй гөж килде. Алҡыштар, шатлыҡлы ауаздар бар Өфөнө күмде. Кемдер йырлай, кемдер илай, тигәндәй... Салауат Юлаев майҙанында төрлө йәштәгеләр бергә хыял, өмөт байрамы үткәрҙе. Бейене, йырланы, киләсәккә пландар ҡорҙо.
Ул көндө һис оноторлоҡ түгел, йөрәктә иң мөһим хәтирә булып һаман йәшәй.
Был йылдар Башҡортостан өсөн бәрәкәтле осор булды - суверенлы республика хоҡуғы яулаған тәүге президент һайланды, яңы конституция раҫланды, үҙәк, сит төбәктәр менән яңыса мөнәсәбәттәр булдырылды.
Халҡыбыҙҙың үҙ асылына ҡайтыу башланғысы ла булды ул: башҡорт милли мәктәптәре, гимназиялар асылыу, тел, мәҙәниәт үҫеше, дингә ҡайтыу осоро башланды. Шулай уҡ социаль-мәҙәни объекттар төҙөлөшөнә, яңы предприятиелар асылыуына нигеҙ һалынды.
Был матур, күңелемдән мәңге юйылмаҫ тарихи ваҡиғалар тураһындағы хәтирәләр ебем һәр ваҡыт мине Өфө менән, гүзәл ҡалам менән бәйләй.

Фәүзиә ЙӘНТИЛИНА,
пенсиялағы уҡытыусы.
Мәләүез ҡалаһы.
"Киске Өфө" гәзите, №34, 2024 йыл

КИРЕ СЫҒЫРҒА