Интернет гиҙеп бер яҙма йөрөнө. Япондар тураһында ине ул. Уларҙа бөгөн биш йөҙләп йөҙ йәште уҙғандар йәшәүе, ун биш йылдан уларҙың һаны миллионға етәсәге тураһында хәбәр итте сығыш яһаусы. Бындай хәл башҡа бер илдә лә булмауын да һыҙыҡ өҫтөнә алды.

Артабан был хәлдең серен былай тип аңлатты: "Йөҙйәшәрлеккә уларҙың туҡланыуы, сей балыҡ, емеш-еләк ашауы сәбәпсе тип уйлаһағыҙ, яңылышаһығыҙ, - тине ул. - Былай туҡланыусы илдәр бихисап, иллә мәгәр уларҙа оҙаҡ йәшәүселәр барыбер күпкә кәмерәк. Был хәлдең сере - япон кешеһенең үҙ уйҙарын, үҙ һүҙен контролдә тота белеүендә. Улар кем менән генә һөйләшкәндә лә уның кәйефен төшөрөрлөк һүҙ әйтеүҙән, юҡ тип әйтеүҙән тыйыла. Улар негативтың кешенең кәйефенә генә түгел, һаулығына насар йоғонто яһай икәнен белә һәм шунан һаҡлана. Улар үҙҙәренең лөғәтенән "Юҡ!" тигәнде бөтөнләй алып ташлаған. Бына шундай фиғелле япондар иҡтисади яҡтан иң алға киткән илдә йәшәй. Ә бит Японияла дөгө сәсерлек тә ер, ҡаҙылма байлыҡтар юҡ..."
Шулай тип йомғаҡ яһап ҡуйҙы был яҙманы һалған егет. Һәм... "Беҙҙең ата-бабалар аҡылында ла бар бит был "Яҡты уйлылар - Аллаһ хозурында, фатихаһында, һөйөүендә", тигән хәҡиҡәт, ул беҙҙең аң төбөндә, фиғелебеҙҙә әле лә һаҡлана..." тигән һығымта яһатты. Уйланайыҡ әле ошо хаҡта, тип әйтергә батырсылыҡ итәм...

Гөлбаныу ГӘРӘЕВА.
"Киске Өфө" гәзите, №36, 2024 йыл

КИРЕ СЫҒЫРҒА