Башҡортостан Башлығы Радий Хәбиров БР Дәүләт Йыйылышы - Ҡоролтайға йыллыҡ Мөрәжәғәтнамә менән сығыш яһаны. Традиция буйынса йыл һайын ойошторолған был сара йәмәғәтселектә лә ҙур хуплау таба, сөнки Мөрәжәғәтнамәлә әйтелгәндәр киләһе йылға иҡтисадты, социаль өлкәне үҫтереүгә, йәшәйеш кимәлебеҙҙе тотороҡло һаҡлауға, яҡшыртыуға ышаныслы күҙаллауҙар бирә. "Әлбиттә, беҙгә ҡатмарлы, артабанғы йәшәйеш йүнәлештәре хәл ителгән заманда йәшәргә тура килә. Беҙҙе һынауҙар һәм тышҡы ҡаршылыҡтар ныҡлыҡҡа тикшерә. Беҙҙе эстән бүлгеләргә маташалар. Ил тарихында бер нисә тапҡыр булған кеүек, беҙ быға берҙәмлек һәм ойошҡанлыҡ менән яуап бирәбеҙ", - тине Радий Хәбиров.

• Республика етәксеһе сығышының башында МХО-ла һәләк булғандарҙы бер минут тынлыҡ менән хөрмәтләп иҫкә алырға тәҡдим итте: "Яҡташтарыбыҙ яуҙа ҡыйыулыҡ һәм ҡаһарманлыҡ күрһәтә. Күптәре дәүләт наградаларына лайыҡ булды. 12 яугирға Рәсәй Федерацияһы Геройы тигән юғары исем бирелде. Ҡыҙғанысҡа ҡаршы, уларҙың һигеҙенә - үлгәндән һуң. Ғүмерен ҡорбан иткән геройҙар хаҡында иҫтәлек беҙҙең күңелдәрҙә мәңге йәшәр", - тине ул. Радий Фәрит улы МХО-ла ҡатнашыусыларға төрлө ярҙам сараларын һанап үтте, уларҙы дауалау, реабилитациялау, эшкә урынлаштырыу һ.б. мәсьәләләрҙең барыһын да комплекслы хәл итеү өсөн республиканың МХО ветерандары ассоциацияһы булдырыласағын, 2025 йылды Башҡортостанда Махсус хәрби операцияла ҡатнашыусыларға һәм уларҙың ғаилә ағзаларына ярҙам йылы тип иғлан ителәсәген билдәләне.

• Республика фронттың ышаныслы терәгенә әүерелде. Оборона-сәнәғәт комплексы предприятиелары оборона заказын үтәү күләмен арттыра. Республика пилотһыҙ осоу аппараттары етештерә, операторҙарҙы уҡыта. Йыллыҡ Мөрәжәғәтнамә менән сығыш яһағанда Башҡортостан Башлығы Радий Хәбиров ошо хаҡта һөйләне. "Башҡортостан фронтҡа, яңы төбәктәргә, Курск һәм Белгород өлкәләренә 139 гуманитар ылау оҙатты. Медиктар, төҙөүселәр, юл һәм коммуналь хеҙмәткәрҙәр унда тыныс тормошто тергеҙеү өсөн күп эштәр башҡара. Беҙҙең шәфҡәт туташтары ҡатын-ҡыҙҙар волонтёрҙар отряды составында госпиталдә дауаланған яугирҙарҙы ҡарай",- тип билдәләне республика етәксеһе һәм ирекмәндәргә рәхмәт белдерҙе.

• 2030 йылға Башҡортостанда торлаҡ төҙөлөшө күләме 4 миллион "квадратҡа" еткерелергә тейеш. Радий Хәбиров Дәүләт Йыйылышы - Ҡоролтайға Мөрәжәғәтнамәһе менән сығыш яһағанда ошондай бурыс ҡуйҙы. "Беҙ торлаҡ төҙөүҙе туҡтатырға тейеш түгелбеҙ. Иртәме-һуңмы, ауыр ваҡыттар үтеп китә. Яңы, уңайлыҡлы фатирҙарға ихтыяж һәр саҡ бар. Ихтыяж арта башлай һәм быға әҙер булырға кәрәк. Хәҙер муниципалитеттарға төҙөүселәр менән бергә әҙерлек эштәре менән шөғөлләнергә - участкалар һайларға, документтар әҙерләргә, биләмәләрҙе комплекслы үҫтереүҙең яңы проекттарын булдырырға, яңы милли проекттар сиктәрендә федераль аҡса йәлеп итергә кәрәк", - тине ул.

• Һуңғы йылдарҙа Башҡортостан белем биреү кимәлен үҫтереүҙә юғары бурыстар ҡуя, тип билдәләне Башҡортостан Башлығы Радий Хәбиров Мөрәжәғәтнамәһендә. Уның билдәләүенсә, уҡытыусылар һәм тәрбиәселәр өсөн бер нисә ярҙам сараһы булдырылған. Капиталь төҙөкләндереү федераль программаһы буйынса 146 мәктәп бинаһы төҙөкләндерелгән. Һуңғы биш йылда республикала 31 мең урынлыҡ 44 яңы мәктәп һәм 65 балалар баҡсаһы төҙөлгән, быйыл иһә тағы ла 4 мәктәп асылған. 2025 йылда Нуғай ҡасабаһында 260 урынлыҡ балалар баҡсаһы төҙөлә башлаясаҡ. Өфөлә иһә федераль ҡаҙна иҫәбенә математика мәктәп-интернаты төҙөләсәк. "Бөтә республиканан йыйылған һәләтле балалар өсөн заманса үҙәк булдырасаҡбыҙ. Был үҙенсәлекле мәктәп буласаҡ", - тип билдәләне Башҡортостан Башлығы.

• "Башҡортостанда киләһе йылдан "Йылдың йәш ғалимы" исеме - 150-шәр мең һумлыҡ ете премия булдырыла, - тине республика Башлығы. - Был йәш белгестәрҙең республика фәненә индергән өлөшө өсөн баһа буласаҡ. Уҙған йыл аҙағында йәш ғалимдарға булдырылған ярҙам саралары буйынса ил рейтингында иң яҡшыһы булдыҡ. Фәнгә ярҙам итеү буйынса бөтә саралар ҙа ғәмәлдә ҡала". Радий Хәбиров шулай уҡ февраль айында дәүләт башлығы Владимир Путин ҡатнашлығында Өфөлә Евразия ғилми үҙәгенең университет-ара кампусының беренсе этабы асылыуы хаҡында һөйләне.

• Башҡортостанда 1 февралдән Фәнни-технологик үҫеш буйынса дәүләт комитеты эшләй башлауы тураһында белдереп, Радий Хәбиров шулай тине: "Дәүләт комитеты юғары белем биреү, фән һәм инновация өлкәһендәге мөһим мәсьәләләр комплексын хәл итеү өсөн булдырыла".

• Башҡортостан Башлығы Радий Хәбиров быйыл Башҡортостандың мәҙәни тормошонда булған мөһим сараларҙы барлап үтте. Ул шулай уҡ: "Циркты реконструкциялауҙы федераль адреслы инвестиция программаһына индереүгә өлгәштек. 2026 йылда уны тергеҙеү эшен башлайбыҙ. Республикаға заманса Музыка йорто талап ителә. Киләһе йылда 2 мең урынлыҡ универсаль концерт залын проектлай башларға йыйынабыҙ", - тип билдәләне.

• Радий Хәбиров Хөкүмәткә 2030 йылға инвестициялар күләмен 1,25 трлн һумға еткереү бурысын ҡуйҙы. "Республика лайыҡлы рәүештә Милли инвестиция рейтингы лидерҙары иҫәбенә инде. Быйыл туғыҙ ай эсендә инвестициялар 24,7 процентҡа үҫте", - тип билдәләне ул.

• Башҡортостан дуҫ илдәр менән, улар 100-ҙән ашыу, тышҡы иҡтисади бәйләнештәрҙе көйгә һалды. Киләһе йылдан 2030 йылға тиклем "Алға экспортҡа!" экспортты үҫтереү төбәк программаһы эш башлай. Радий Хәбиров Хөкүмәткә сит илдә Башҡортостан етештереүселәренең продукцияһын һатыу өсөн сауҙа йорттары төҙөү концепцияһын әҙерләргә ҡушты.

• Республика агросәнәғәт комплексын технология йәһәтенән модернизациялауға әүҙем булышлыҡ итә. Быйыл ғына дәүләт ярҙамы менән аграрийҙарыбыҙ 11 миллиард һумға яҡын суммаға 2,4 мең берәмек техника һатып алды. "Беҙгә агрокластарҙан башлап, агросәнәғәт кадрҙарын үҫтерергә, ауылдарҙа белгестәргә лайыҡлы йәшәү, эшләү, ял итеү шарттары булдырырға кәрәк", - тип билдәләне Радий Хәбиров.

• Радий Фәрит улы билдәләүенсә, киләһе йылда баш ҡалабыҙҙа Һаҡлыҡ банкы ярҙамы менән Ленин исемендәге паркты реконструкциялау, Салауат Юлаев һәйкәлен реставрациялау башлана. Өфө үҙәгендә иң уңышлы етәкселәрҙең береһе Миҙхәт Закир улы Шакировҡа һәйкәл асыласаҡ. "Беҙ халыҡҡа баш ҡаланың Октябрь революцияһы урамын йәйәүлеләр өсөн тәғәйенләргә тигән вәғәҙә биргәйнек, уның менән шөғөлләнәбеҙ. Халыҡ күптән инде Өфөлә зоопарк булдырыуҙы һорай. Беҙ уны Урмансылар паркындағы ғәмәлдәге вольерҙар урынында ойошторорға уйлайбыҙ", - тине Радий Хәбиров.

• "Ғүмер оҙайлығының 73,13 йәшкә тиклем етеүе һаулыҡ һаҡлауҙың төп ҡаҙанышы булды. Беҙ шулай уҡ балалар үлеме осраҡтарын кәметеүгә лә өлгәштек", - тине Радий Хәбиров һәм муниципалитет башлыҡтарына табиптарҙы урындарҙа ҡалдырыу өсөн шарттар булдырырға, уларға һәр яҡлап ярҙам күрһәтергә ҡушты. "Ауыл табибы", "Ауыл фельдшеры" программаларына ярашлы бөтәһе 162 медицина хеҙмәткәре 500 меңдән 1,5 миллион һумға тиклем түләү алған. "Бәләкәй медицина ойошмалары өсөн табиптар" программаһы буйынса тағы 49 табипҡа миллион һум тапшырылған.

• Киләһе йылдан Башҡортостан мәктәптәренең йәш етәкселәре - гранттар, ә меңләгән уҡытыусы үҙебеҙҙең шифаханаларҙа санатор-курорт хеҙмәттәренә сертификат аласаҡ. Был яңылыҡ та Башҡортостан Башлығы Радий Хәбировтың БР Дәүләт Йыйылышы - Ҡоролтайға йыллыҡ Мөрәжәғәтнамәһендә сағылыш тапҡан.

• Шулай итеп, республика Башлығы Радий Хабиров сығышының аҙағында ошондай еңел булмаған осорҙа уға республика менән идара итеүгә ышаныс белдергәндәре өсөн Башҡортостан халҡына рәхмәт белдерҙе һәм: "Ватаныбыҙ ҡеүәте һәр саҡ уның халыҡтарының берҙәмлегенә таянған. Һәр ваҡыт шулай буласаҡ та. Бергә эшләйбеҙ, бергә көрәшәбеҙ, бергә Рәсәйҙе һаҡлайбыҙ. Киләһе йыл Бөйөк Еңеүҙең 80 йыллығын билдәләйәсәкбеҙ. Ул байрам беҙҙе өлкән быуындың ҡаһарманлығы һәм батырлығына, ҡаҡшамаҫ рухи көсөнә тиңләшергә саҡыра. Беҙ бергәләп теләһә ниндәй ауырлыҡтарҙы ла еңәсәкбеҙ. Еңеү беҙҙең яҡта буласаҡ икәнен дә беҙ беләбеҙ" , - тине.

"Киске Өфө" гәзите, №49, 2024 йыл

КИРЕ СЫҒЫРҒА