Емеш ағастарын ҡасан ҡырҡыу яҡшыраҡ? Быны йылдың теләһә ҡайһы ваҡытында башҡарырға мөмкин, әммә быны яҙ көнө эшләү уңайлыраҡ. Шулай тип аңлатты "Башинформ " агентлығына Башҡорт дәүләт аграр университетының үҫемлекселек, үҫемлектәр селекцияһы һәм биотехнологиялар кафедраһы доценты Азат Вәлитов. Уның кәңәштәре баҡсасыларға файҙалы булыр, моғайын.

- Яҙын ағастарҙың ҡарт һәм ауырыу ботағын ҡырҡһаң, емештәре ҙурыраҡ була, уңыш 30-70 процентҡа арта, ағастың һыуыҡҡа сыҙамлығы ла күтәрелә. Бынан тыш, уларҙы ауырыуҙарҙан һәм ҡоротҡостарҙан эшкәртеү еңелерәк.
Ваҡыттан тыш, башҡа нескәлектәр ҙә бар. Ағасты киҫергә тотонор алдынан эш ҡоралдарын дезинфекцияларға кәрәк. Юғиһә, инфекция йоҡторорға мөмкин.
Йәш ағастарҙы артыҡ ныҡ киҫмәгеҙ. Ауырыу, һынған, ҡороған ботаҡтарын ғына алығыҙ. Шулай уҡ ботаҡтарҙың структураһын һаҡлау өсөн бер йыллыҡ үҫемлектәрҙе ҡыҫҡартырға мөмкин.
Тотош ҡырҡылырға тейешле ботаҡтың төбө ҡалмаһын өсөн, уны түңәрәкләп кенә алығыҙ. Әгәр ботаҡ ҡалын булһа, ҡабығын зарарламаҫ өсөн аҫҡы яҡтан, шунан һуң өҫтән ҡырҡығыҙ.
Ағастың бөрөһөнә бысаҡ менән теймәҫкә тырышығыҙ. Бөрөһөн ҡалдырып киҫеү өсөн эргәләге ботаҡ яғынан 45 градусҡа ҡыйшайтып, секатор менән ҡырҡығыҙ. Бысаҡ араһы 1-2 мм түбәнерәк, ә икенсеһе 1-2 мм юғарыраҡ урынлашһын.
Ҡарт ботаҡтарҙы ҡырҡҡандан һуң туҡландырығыҙ. Һүҙ, тәү сиратта, азотлы ашлама тураһында бара - улар йәш үҫентеләрҙең үҫеше өсөн кәрәк. Мәҫәлән, ағас төбөнә тупраҡҡа тиреҫ (1 квадрат метрға 45 кг) йәки тауыҡ тиреҫе (12 кг) индерергә мөмкин.
Органика урынына минераль ашлама ҡулланырға ла мөмкин. Мәҫәлән, аммофос, аммиак селитраһы йәки карбамид (мочевина).
Азотлы ашламаларҙы бер юлы түгел, ә ике тапҡыр ҡулланырға кәңәш итәм. Яртыһын - апрелдә, икенсе өлөшөн июнь башында һалығыҙ.
Азоттан тыш, ҡырҡылған ағастарға фосфор кәрәк, сөнки ул сәскә атыуҙы көсәйтә, шулай уҡ калий мөһим. Ул емеш сифатын яҡшырта һәм һыуыҡҡа сыҙамлылығын арттыра. Фосфорҙы яҙын, ә калийҙы көҙөн һалығыҙ.
Ашлама һалғас, 1 квадрат метрға 2-3 күнәк иҫәбендә һыу ҡойоғоҙ. Икенсе көндө тупраҡты йомшартығыҙ.

"Киске Өфө" гәзите, №13, 4 - 10 апрель 2025 йыл

КИРЕ СЫҒЫРҒА