Башланды... Коронавирустан да дер ҡалтырап, депрессияла йәшәүсе халыҡтың нервыларын әле килеп мәңге туймаҫ "Теплосбыт" филиалдары ҡапшай ҙа башланы: хаҡтар тағы ла артасаҡ, тип һөйөнсөләй улар.

Йылылыҡ ресурсы хужаларына был ҙур һөйөнөс, әлбиттә, әйтерең бармы, ә халыҡ өҫтөнә көйөнөс артынан көйөнөс яуып ҡына тора. Йә күҙ терәп торған ризыҡтарына хаҡ арта, йә коммуналь хеҙмәттәргә. Әле ҙур хәбәр итеп, һүҙ юҡта һүҙ булһын, тигәндәй, Башҡортостанда йылылыҡ өсөн хаҡтарҙың ни өсөн ҡабара барыуының сәбәптәрен аңлаталар. Тарифтар буйынса БР Дәүләт комитеты ла "Теплосбыт" көйөнә көйләнгән, ахыры. Был ведомство хужаһы С.Бурдюк тигән ханым аңлатма биреүенсә, илдең башҡа эре ҡалаларына ҡарағанда, Өфөлә йылылыҡ тарифының юғары булыуы йылылыҡ сығанаҡтары һанына бәйле, имеш. Мәҫәлән, ти ул, Ҡаҙан ҡалаһында йылылыҡ сығанаҡтары һаны ни бары 45 процент тәшкил итһә, Өфөлә ул - 91 процент. Үҙәк йылылыҡ пункттары тариф иҫәбенә "аҫрала" ти ул, ә улар Ҡаҙанда - 125, Өфөлә - 298. Был ғына ла етмәй әле аҡланырлыҡ сәбәп өсөн, өҫтәүенә, тағы бер сәбәп килтерелә: йылылыҡ селтәрҙәре оҙонлоғо ла халыҡ кеҫәһе яуы икән дә. Бурдюк нишләптер тағы ла Ҡаҙан өлгөһөн телгә ала: унда бына әлеге оҙонлоҡ һис тә оҙон түгел - 579 км ғына икән, ә Өфөлә - 1063,8 км , йәғни Ҡаҙанға ҡарағанда 83 процентҡа күберәк! Беҙгә нимә, хәҙер Ҡаҙанға күсеп китергәме инде? Дөрөҫөн әйткәндә, ҡулланыусыны хаҡтар артыу сәбәптәре ҡыҙыҡһындырмай ҙа, уның былай ҙа ҡайғыһы баштан ашҡан. Был хаҡта ресурс хужаларының үҙҙәренең башы ауыртһын. Ә инде законһыҙ рәүештә тарифтарҙы икеләтә-бишләтә арттырып, халыҡты талау юлы менән генә хәлдән сығырға өмөт итәләр һәм эште башҡаса цивилизацияға ярашлы ойоштора белмәйҙәр икән, компанияны дәүләт ҡарамағына тапшырһындар, банкротлыҡ иғлан итһендәр. Халыҡтың аҡтыҡ аҡсаһын ҡайырып алып, кем дә эш күрһәтә ала. "Теплосбыт" филиалы "БашРТС" директоры И.Попова ла, йылдағыса, үҙ йырын көйләй. Бурдюк ханымдың һүҙҙәрен ҡеүәтләп, ул әле октябрҙә үк ҡулланыусынан аҡса ҡайырмаҡсы. Йәнәһе лә, быйыл октябрь былтырғыға ҡарағанда "чуть-чуть" һалҡын булды, имеш...Ә фатирҙарҙағы батареялар бит, киреһенсә, "чуть-чуть" йылымыс булманымы ни, Попова ханым?

Фәүзиә ИҘЕЛБАЕВА.
"Киске Өфө" гәзите, №45, 2021 йыл

КИРЕ СЫҒЫРҒА