2021 йыл, мәғлүм булыуынса, Бөтөн донъя башҡорттары ҡоролтайы Башҡарма комитеты инициативаһы менән Башҡорт тарихы йылы тип иғлан ителде һәм ул "Данлы тарих - ғорур вариҫ" девизы аҫтында үтте. Йәштәр, мәктәп уҡыусылары үҙ тарихы менән ҡыҙыҡһынамы, тамырҙарын беләме, баҫма матбуғатты уҡыймы икәнен асыҡлар өсөн йыл дауамында гәзитебеҙҙә сыҡҡан мәҡәләләр нигеҙендә бәләкәй генә викторина үткәрергә булдыҡ. Һеҙҙән яуаптар, иң әүҙем һәм һорауҙарға дөрөҫ, тулы яуап биреүселәргә - беҙҙән бүләктәр! Иң тәүге булып тулы яуап биреүсегә 7 томдан торған "Башҡорт энциклопедияһы". Алға!

1. Борон умартасы ҡортон ниндәй кешегә һатҡан һәм ни өсөн? Был турала ниндәй мәҡәл бар?
2. Салауат Юлаев, Степан Разин, Сыңғыҙхан, Кемаль Ата Төрк, Эдип, Гарнагон, Юлғотло, Нөгөш, Миңлеғәли Шайморатов... Башҡарған ролдәренең осона сығып булмаһа ла, сәнғәт һөйөүселәр өсөн ул - сәхнә генералы. Һүҙ кем хаҡында бара?
3. Башҡортлоҡто Назар Нәжми нимәгә тиңләй?
4. 11 йәшендә 42 картинала уйнаған, былтыр сентябрҙән алып быйылға тиклем Голливудта киноға төшкән ҡыҙҙың һәм уның туғанының исем-фамилияһы.
5. 1895 йылда венгр ғалимы А. Вамбериҙы Башҡортостан буйлап кемдәр оҙатып йөрөй һәм уға башҡорт теле буйынса материалдар йыйыуҙа ярҙам итә?
6. Төньяҡ-көнбайыш башҡорттарының иң билдәле ойошмаһы нисек атала һәм уның етәксеһе кем?
7. Башҡортостандың был халыҡ шағирының нәҫеле эске йылан ырыуына ҡарай. Кем ул?
8. "Типтәр" терминының килеп сығышына ишара булырҙай ниндәй башҡорт мәҡәле бар?
9. Борон балды ниндәй һауытҡа йыйғандар һәм был нимәгә бәйле?
10. "Башҡорт Википедияһы"нда мәктәп йәшендәге балалар, үҫмерҙәр, йәштәр, шулай уҡ теләге булғандар өсөн ойошторолған конкурс нисек атала?

"Киске Өфө" гәзите, №47, 2021 йыл

КИРЕ СЫҒЫРҒА