Бөгөнгө замандың булдыҡлы ҡатын-ҡыҙы бөтә эшкә лә өлгөрә: донъяһын да ҡарай, балалар ҙа үҫтерә, күңеленә ятҡан шөғөлөнә лә ваҡыт таба.

Мәләүез ҡалаһында йәшәүсе уңған хужабикә, ете бала тәрбиәләүсе әсә Гүзәл Юлмәтова ла тап шундай егәрле-ләрҙең береһе. Ҡул эштәренә маһирлығы бала сағынан килә. Бөгөн ул ҡурсаҡтарға милли кейемдәр тегеү менән мауыға. - Ҡурсаҡтарҙы төрлө ерҙән йыям мин. Балалары үҫеп, уларҙың кәрәге ҡалмағас, кешеләр сығарып ташлағандары ла бик ярап ҡала, таныш-тоноштарҙың ҡайҙа ҡуйырға белмәгәндәрен дә йәһәт кенә эләктерә һалам, - тип йылмая Гүзәл. Үҙебеҙҙең милли кейем кейгән ҡурсаҡтарҙың һәр ҡайһыһын ҡулыма алам да, уларға кейем тегеүҙең ни тиклем сабырлыҡ талап иткән нескә эш икәнен аңлайым. Етмәһә, оҫта ханым уларға төрлө төҫтәге ваҡ ҡына сәйлән, мәрйендәр ҡулланып биҙәүестәр ҙә яһай. Төҫ-башы уҡ башҡорт ҡыҙына тартып торған балитәкле күлдәктәгеһенең һаҡалын, ҡашмауын эшләү ҙә бары тик Гүзәл кеүек түҙемле кешенең генә ҡулынан килә торған шөғөлдөр, тип уйлап ҡуям.
Уның үҙ күңеле өсөн генә башланған эше башҡаларға ла бик оҡшап ҡала, ҡурсаҡтарға милли кейемдәрҙе төрлө саралар өсөн махсус тектергәндәр ҙә, әҙер ҡурсаҡтарҙы һатып алғандар ҙа бар. Бөгөн күберәк балалар баҡсаларынан заказдар ҡабул итә оҫтабикә. Был да аҙмы-күпме аҡса эшләү өсөн бына тигән кәсеп!
- Ҡурсаҡтарға кейем тегеүгә тотоноуымды бала саҡта уйынсыҡ етмәүгә бәйләйем. Беҙ үҫкәндә улар хәҙерге кеүек магазиндарҙа тулып ятманы бит, ҡытлыҡ заман ине. Уларға ябай күлдәктәр түгел, милли кейемдәр тегеү күңелемә ниндәйҙер тыныслыҡ һәм бөтөнлөк бирә, - ти әңгәмәсем, шөғөлө хаҡында һөйләгәндә.
Һатып алыусыларҙың теләге буйынса, ҡурсаҡтарын башҡа милләт кейемдәренә лә кейендерә Гүзәл. Ҡупшыҡайҙарының барыһын да ярата оҫтабикә, ә шулай ҙа күңеленә үҙебеҙҙең милли кейемдәгеләре яҡыныраҡ икән…

Лена ХӘЙРУЛЛИНА.
"Киске Өфө" гәзите, №30, 2022 йыл

КИРЕ СЫҒЫРҒА