Һүҙ юҡ, бөгөнгө йәштәр менән ғорурланырға була. Улар әлеге оло быуын кешеләренән бик күп матур сифаттары менән айырыла. Әммә... яуаплылыҡ тигәне самалы инде.

Нимә ул яуаплылыҡ? Ул минең аңымда кешенең тормоштағы урынын, абруйын, башҡаларҙың ышанысын нығытыусы, хөрмәтле шәхес итеп әүәләүсе иң төп сифат. Хәҙерге йәштәрҙең ҡайһы берҙәре араһында был сифат бик үк һанға һуғылмай һымаҡ күренә. Ундайҙар шул арҡала бер сиктән икенсеһенә һуғылырға, үҙемде эҙләйем, тигән һылтау менән эштән-эшкә күсеп йөрөргә, ҡыҙыҡһыныуҙарын алыштырырға, мөнәсәбәттәргә хыянат итергә мөмкиндәр. Ундайҙар хатта яуаплылыҡ тигән сифатты һанға һуҡмау арҡаһында илһөйәрлек, телһөйәрлектең ысын баһаһын да аңламаҫҡа мөмкин...
...Йәш ғаилә ағзалары йыйылған бер ҡорҙа бөгөнгө сәйәси хәлдәр тураһында һөйләшеп киттеләр. Барыһы ла белемле, төрлө вазифалар биләгән йәштәр. Барыһы ла бөгөн бар хәлдәрҙе насар итеп күрһәтергә тырышҡан бер егеттең һүҙен йөпләй, үҙҙәре лә ҡушылып китә. Уларҙың был әңгәмәһен бүлеп, нимәлер иҫбат итергә маташыу урынһыҙ тип уйлап, өндәшмәйем...
Йәш атай-әсәйҙәр эргәләрендә бәләкәй һәм мәктәп йәшендәге балалары урала, улар йә уйын менән мәшғүл, йә өҫтәл артына ултырып, ризыҡтарҙың тегеһен-быныһын барлай. Барыһы ла русса һөйләшә. Әлбиттә, һәр кемдең, шул уҡ йәштәрҙең дә, дөрөҫмө-түгелме, үҙ фекерен әйтергә хоҡуғы бар. Ә бына был хәлгә - балаларын туған телдән мәхрүм итеүгә уларҙың хоҡуғы юҡ. Тап ошо юҫыҡта түҙмәнем, телем сиселде лә китте: "Һеҙ кемде, нимә өсөн тәнҡитләйһегеҙ? Тыуған ерегеҙ өсөн, халҡығыҙ өсөн һеҙ үҙегеҙ нимә эшләнегеҙ? Һеҙ бит үҙегеҙҙең иң төп бурысығыҙҙы- балаларығыҙҙы туған телгә өйрәтеүҙе лә үтәмәгәнһегеҙ. "Ҡараңғылыҡты әрләгәнсе, үҙең бәләкәй булһа ла бер шәм тоҡандыр", тигәнде беләһегеҙме?"
Йәштәрҙең дә, минең үҙемдең дә кәйеф төштө. Кәйефһеҙ таралыштыҡ. Белмәйем, берәйһе ҡолаҡ һалдымы, уйландымы минең тәнҡиткә? Нисек кенә булмаһын, улар хәҙер минең алда әлегесә һөйләшеүҙе башламаясаҡ. Минең менән ҡорҙаш булырға теләһәләр әле...

Гөлбаныу ГӘРӘЕВА.
"Киске Өфө" гәзите, №32, 2022 йыл

КИРЕ СЫҒЫРҒА