Башҡортостан Башлығы Радий Хәбиров республикала мәктәп туҡланыуы системаһын үҙгәртеп ҡороу тураһында һөйләне. Республиканың мәктәп туҡланыуын ойоштороу тәжрибәһе бер нисә тапҡыр илдә иң яҡшы тәжрибә булараҡ танылды, тип билдәләне ул.

"Беҙ был эште үҙгәртеүгә ирештек. Ләкин тынысланырға ярамай - мәсьәлә бик мөһим. Һөҙөмтәлерәк эшләү өсөн беҙ республиканың Сауҙа һәм хеҙмәттәр министрлығы ҡарамағында социаль туҡланыу идаралығын булдырҙыҡ. Идаралыҡ мәктәптәрҙә, балалар баҡсаларында, дауаханаларҙа туҡланыуҙы, шул иҫәптән халыҡтың мөрәжәғәттәре буйынса пландан тыш тикшереү үткәреү өсөн яуаплы. Ошондай тикшереүҙәр күрһәтеүенсә, проблемалар бар әле. Әммә динамика бик яҡшы. Бер йыл эсендә ашнаҡсыларҙың ризыҡ әҙерләү технологияһын боҙоу осраҡтары һиҙелерлек кәмене", - тип яҙа ул социаль селтәрҙә.
Радий Хәбиров шулай уҡ аккредитацияланған лабораторияның эше тураһында иҫкә төшөрҙө. Беренсе кварталда унда социаль учреждениеларҙың ашханаларынан 1087 өлгөнө анализлағандар. "Беләм, ялыуҙар бар. Ҡайһылары аныҡ башҡарыусыларҙың, туҡланыуҙы ойоштороусыларҙың йәки ашхана хеҙмәткәрҙәренең эшләп еткермәүенә бәйле. Ҡайҙалыр баланың теләгенә тап килтерә алмайбыҙ, бында барыһы ла индивидуаль, - тине республика етәксеһе. - Иң мөһиме, бындай осраҡтар һирәк".

"Киске Өфө" гәзите, №21, 2024 йыл

КИРЕ СЫҒЫРҒА