Был фотолағы егеттәр Әбйәлил районы Үтәгән ауылында йәшәйҙәр. Әлеге мәлдә улар атай-олатайҙарына, өлкән ағайҙарына эйәреп, ямғырҙан һуң соҡор-саҡыры күбәйеп киткән ауыл юлдарын төҙөкләндереү эштәрендә ярҙам итә.

Сираттағы эш мәлендә бергәләп фотоға төшкәндәр ҙә инде. Аяҡҡа баҫып тороуҙары - ныҡ, башҡарған эштәренең мөһимлеген аңлауҙары күҙҙәрендә сағыла. Үҙҙәренә генә яраҡлы бәләкәй көрәктәренең дә булыуы, уларҙың эш рәтен белеп, ололарға ярҙамсы булып үҫеп килгән егеттәр икәнлектәрен әллә ҡайҙан күрһәтеп тора, афариндарҙың.
Берҙәмлектә - көс, тигән халҡыбыҙ. Ошо хәҡиҡәтте дәлилләп йәшәй Үтәгән ауылы халҡы. Ауылдың юлдарын төҙөкләндереү тураһында һүҙ сыҡҡас та, барыһы ла дәррәү генә йыйылып, йүнәтеп тә ҡуйған. Ауыл депутаты Рөстәм Мансуров етәкселегендәге өмәлә йәше-ҡарты ҡатнашҡан, ир-егеттәр техникаһын да тапҡан, үҙҙәренең эштәрен ситкә ҡуйып, ваҡыттарын да бүлгән. "Өс көн дауамында барған эштәр ауылдың йөҙөн генә йәмләп ҡалманы, ә юл йөрөүгә бәйле хәүефтәрҙе кәметте", ти урындағы халыҡ.
Үтәгән - ҙур һәм матур ауыл һәм әле булһа үҫеүен дауам итә. Олоһо-йәше өй-ихаталарын төҙөк һәм таҙа итеп тотоп йәшәй, барыһы ла ауыл һәм район тормошонда әүҙем ҡатнаша. Ауылдың киләсәге өсөн хәүефләнәһе түгел, сөнки бында берҙәм, дәррәү, эшлекле халыҡ йәшәй.

Гөлназ МАНАПОВА.
"Киске Өфө" гәзите, №33, 2024 йыл

КИРЕ СЫҒЫРҒА