Күптән түгел интернет селтәрендә Өфөнөң 8-се ҡала дауаханаһы офтольмологтары тарафынан 40 йәшлек ҡатын-ҡыҙҙың күҙенән оҙон селәүсен алыуҙары тураһында хәбәр баҫылды. Пациент һул күҙенең аҫҡы өлөшөндә "хәрәкәт" һәм тығыҙланыу тойғоһона зарланған булған.

8-се дауахананың күҙ микрохирургияһы бүлеге мөдире, Башҡортостан Республикаһы Һаулыҡ һаҡлау министрлығының штаттан тыш баш офтальмологы Светлана Зәйнуллина белдереүенсә, бындай осраҡтар табиптар тәжрибәһендә була, әммә йыш түгел. "Бындай ауырыу күҙ дирофиляриозы, тип атала һәм ул күҙ аҫты күҙәнәксәһендә йәки күҙ алмаһы структураларында гельминттар булған гранул йәки төйөндәр барлыҡҡа килеүе менән оҙатыла. Ҡорттоң уртаса оҙонлоғо 145 мм тәшкил итә. Ҡағиҙә булараҡ, гельменттар кеше организмында енси яҡтан өлгөрмәйенсә үлә", - ти Светлана Зәйнуллина.
Паразит кеше тәнендә серәкәй тешләгәндән һуң барлыҡҡа килергә мөмкин, ә серәкәйҙәр өсөн йоғошло сығанаҡтар - ҡырағай эттәр, һирәк осраҡта бесәйҙәр. Сәйәхәт ваҡытында ла сир йоҡторорға мөмкин. Мәҫәлән, дауаханаға күҙ ауыртыуына зарланған ҡыҙ мөрәжәғәт иткән. Уның һүҙҙәренсә, барыһы ла аяҡтан башланған, ул унда нимәлер шыуышып йөрөгәнен тойған. Һөҙөмтәлә офтальмолог конъюнктив аҫтында паразит таба һәм уны алып ташлай. Пациентты артабан тикшереү өсөн инфекция дауаханаһына ебәрәләр.
Әгәр селәүсен күҙгә эләкһә, ул шешә, ҡысыта һәм күҙ йәштәре аға. Күҙ тиреһе аҫтындағы тығыҙлыҡтар ҙурая һәм формаһын үҙгәртә ала, әгәр гельминт конъюнктив аҫтында йәки күҙ алмаһында булһа, ят есем һәм хәрәкәт тойғоһо буласаҡ. Медикаментоз терапия гельминтҡа ҡаршы дарыуҙар ҡулланыуға ҡайтып ҡала. Иҫкәртеүгә килгәндә, бында йорт хайуандарын ваҡытында тикшерергә, дегельминтизация үткәрергә кәрәк. Бынан тыш, биләмәләрҙе серәкәйҙәрҙән эшкәртеү мөһим. Әгәр кеше ваҡытында медицина ярҙамы һорап мөрәжәғәт итһә, күҙ өсөн етди эҙемтәләрҙән ҡотолорға мөмкин, тип белдерә табип.

"Киске Өфө" гәзите, №13, 4 - 10 апрель 2025 йыл

КИРЕ СЫҒЫРҒА