Матурлыҡ тыуҙырыу һәр кемдең ҡулынан киләме? Ә бына был көләкәс ҡыҙыҡайҙың төрлө ижад емештәре, һис шикһеҙ, тирә-яҡты йәмләй. Таныш булығыҙ: Әбйәлил районы Асҡар ауылындағы Таһир Кусимов исемендәге гимназияның 6-сы синыфы уҡыусыһы Нәзилә Хәмитова.

Әлеге матур, күҙ яуын алырлыҡ тәрилкәләрҙе эшләү серҙәрен Асҡар ауылының Йәш техниктар станцияһындағы түңәрәктә өйрәнә ул. 3-сө синыфта ябай һүрәт төшөрөүҙән башлаған шөғөлөн артабан үҫтереп, бөгөнгө көндә матур итеп таҡтаға яндырып һүрәт, 3Д ручка менән күләмле һүрәт эшләй, быялаға һәм тәрилкәләргә һүрәт төшөрә. Ижади эш уның күңеленә шул тиклем яҡын, түңәрәк булмаған көндәрҙә өйҙә үҙе эпоксид ыҫмала ярҙамында төрлө биҙәүестәр яһай. Бар күңелен һалып эшләгән шөғөлө уға төрлө конкурстарҙа еңеүҙәр килтерә. Шулай, Балалар һәм үҫмерҙәр ижады республика конкурсында I дәрәжә лауерат исеменә, Өҫтәмә белем биреү учреждениелары араһында биҙәү-ҡулланма ижад буйынса XV зона фәнни-ғәмәли конференцияһында 1-се урынға лайыҡ була ул.
- Миңә ҡул эштәре, ижад менән булыу ныҡ оҡшай. Шулай уҡ үҙемдең эштәремде төрлө конкурс һәм ярыштарҙа күрһәтеү, уларҙы баһалауҙары, тәүге урындар яулау миңә ышаныс бирә. Бындай еңеүҙәрҙән һуң тағы ла күберәк матур әйберҙәр эшләргә теләгем арта. Үҙең тирәләй матурлыҡ булдырыу яҡшы ла инде. Үҙемдең эштәремде һатыуға ла сығарғым килә. Түңәрәк етәксеһе Зәйтүнә Әкрәм ҡыҙына миңә ошондай матур әйберҙәр эшләргә өйрәткәне өсөн рәхмәт. Шулай уҡ мине төрлө ҡалаларға конкурстарға алып йөрөргә һәр саҡ мөмкинлек тапҡан әсәйемә рәхмәт. Апайҙарым минең эштәремде маҡтап, һәр саҡ һоҡланыуҙарын белдереп тора. Уларға ла рәхмәт. Артабан да түңәрәктә шөғөлләнеүҙе һәм матур-матур әйберҙәр эшләүҙе дауам итәсәкмен, - ти Нәзилә.

"Киске Өфө" гәзите, №14, 11 - 17 апрель 2025 йыл

КИРЕ СЫҒЫРҒА